◎柯三益
約翰一書2章20、27節，約翰福音14章17、26節
咱若是參加濟濟靈恩 ê 特會，常常會聽及會講有關「恩膏」ê 話，而且掠作按呢是真屬靈，若是有兩 ê 講員 tī 講道前 ê 祈禱，一 ê 講︰「求聖神恩膏膏抹祢奴僕 ê 嘴」；另外一 ê 講︰「求主藉著祢奴僕 ê 嘴向阮講話」，若是按呢，你會感覺 toh 一位講員比較卡屬靈？雖然 tī 互人感覺屬靈 ê 聚會中，但是真多基督徒猶原無清楚聖經本身關係「恩膏」ê 教導，當然也包括我在內。到底「恩膏」是什麼？所謂「聖神 ê 恩膏」是什麼？「聖神 ê 恩膏膏抹」閣是什麼？這款華語 ê 講法欲轉換成做咱習慣 ê 母語來講，著怎樣講呢？咱對聖經中上帝 ê 話來找「恩膏」真正所代表 ê 意思，亦是講意義是什麼？出埃及記30章22～25節有記載聖膏 ê 配方是流質 ê 沒藥（6公斤）、香肉桂（3公斤）、菖蒲（3公斤）、桂皮（6公斤）、橄欖油（4公斤）。對舊約時代 ê 歷史記載來看，「膏」、「聖膏」、「聖油」或是講「抹油」，這是有真實 ê 物件來使用，當一 ê 人或是一 ê 物件受抹油 ê 時，基本 ê 意義就是將人或是物件分別做聖，成做上帝 ê 路用及器具，閣有一個重點就是受抹油 ê 人 ē-thang 領受上帝 ê 靈，親像掃羅或是大衛一樣。
若是新約時代無閣有被抹油分別做聖 ê 物件，只有被抹油分別做聖 ê 人。三 ê 佇舊約原來分開 ê 神聖職分（先知、祭司及君王），tī 新約中攏集中 tī 主耶穌身上，「主耶穌是受膏者」「主耶穌是受抹油 ê」。拿撒勒人耶穌被稱作基督（希臘文）或彌賽亞（希伯來文），中文就翻譯做「受膏者」、「受抹油的人」。使徒行傳10章38節講：「上帝用聖神及才能為拿撒勒人耶穌抹油。」意思是講，當主耶穌受洗 ê 時，天父上帝就用聖神及才能當作聖油抹 tī 耶穌 ê 身上。就是聖神降臨 tī 耶穌身上，伊就承擔了彌賽亞 ê 職分，亦開始公開執行伊 ê 職務。Thang 講耶穌來世間了後，恩膏無閣是用橄欖油所調配 ê 聖膏油若定，已經有了新配方。
和合本聖經約翰一書2章27節講 ê 恩膏是常存 tī 咱 ê 心內；約翰福音14章17節耶穌向學生講：「聖神常常及恁同在，亦欲 tī 恁內面。」約翰一書2章27節講到：「……恩膏 tī 凡事頂面教示恁……」而約翰福音14章26節耶穌講：「聖神欲將一切…… ê 事指教恁。」約翰一書2章20節講：「知識是有恩膏…… ê 結果。」Tī 這款 ê 關係來看，恩膏作聖神 ê 解釋是適當 ê，所以 tī 新中文譯本已經無「恩膏」chit 兩字，是用聖神來翻譯。原來聽起來使人感覺真屬靈 ê 恩膏，就是咱真熟悉，常常與咱同在 ê 聖神保惠師。華語所講 ê「恩膏膏抹」就是咱所經歷 ê 聖神充滿。我想無定有真濟兄弟姊妹及我 kâng-khoán 無清楚現代關於「恩膏」講法 ê 意思，只是感覺及猜想伊大概 ê 用意。重要 ê 問題是當基督徒習慣用不符合聖經 ê 用意來使用聖經話語 ê 時， tī 無形中就會影響咱 ê 思想、信仰及行為。我想咱若無清楚家己 ê 講法及信仰，這是一件非常嚴重 ê 代誌，咱應該更加謹慎使用咱 ê 話來表達咱 ê 信仰，親像中華信義會神學院普愛民教授講 ê 一段話值得咱深深來思考：「咱應該清楚 jīn-bat、相信、而且承認來自上帝 ê 話語是真理，亦通過真理來服事人。基督徒要有把握，確定家己所講出來 ê 話是符合上帝 ê 話，不但容易明白並且對別人有利益。如果無這款 ê 把握，咱上好嘴合起來無講。」
咱著隨時靠著聖神謹慎家己，用心來面對一切 ê 代誌，相信天父上帝已經因為耶穌基督 ê 緣故，將聖神降臨 tī 咱 ê 身上，chit-ê 聖神 ê 降臨就是恩膏 ê 膏抹，chit 時咱已經是及主耶穌同款是受抹油 ê。當咱經歷上帝抹油 ê 授職，彼得前書2章9節講咱是有君尊 ê 祭司，tī 上帝面前只要咱承認耶穌是救主，攏平平得到抹油，每一 ê 人所領受 ê 攏 kâng-khoán，無講什麼人抹卡厚，什麼人抹卡濟，只要打開心門，順服聖神 ê 帶領，伊就會不斷充滿佇咱 ê 心內，咱 ê 心靈就會永遠保持青春及活力，互咱有氣力來跟 tè 大祭司主耶穌 ê 腳步，運用聖神所分互咱 ê 恩賜及主同工，來榮耀天父上帝 ê 聖尊名。
