◎施俊州
1954 年 2 月 15，民聲廣播電台出版天聲音樂歌謠研究會編 ê《台灣廣播流行歌集》（中山出版社發行），收 60 首台語歌。查一下 ê 資料，lán pháng ē-sái khioh 2 條歌謠史線索，thang tháu chit 本歌集 ê 歷史背景。
1. 1954 年 kha-tau，洪一峰 ùi 台南去 tī 台北，chham 兄哥洪德成 kap 小鳳 tī 民聲廣播電台製作現場歌唱節目（小鳳主持），歌手兼樂師 kap 指揮。2. Koh chìn 前，1947 年洪一峰 kap 翁志成組「天聲音樂研究會」；洪一峰畫插圖，鄭日清謄詞、刻鋼版，油印、發行台語歌本。Kàu chia 來，lán tō ē-sái kā chit 本歌集 hē tī 洪一峰（洪文昌）、洪德成、翁志成等人 ê 著作目錄內底，mā thang 報 ta̍k-ê 知歌集 ê 其他作者：
《台灣廣播流行歌集》。天聲音樂歌謠研究會編。文拍、洪德成、蔡啟東、陳達儒、陳聰文、陳錦祥、洪文昌、林清月、林榮和、郭添福、黃藝華、林榮芳、周添旺、翁志成、愛桂女士、吳文淵、林合、何植福等作詞；宏文、洪文昌、洪志鳳、林朝琴、詹志成、翁志成、陳聰文、黃藝華、張衣福、溫錦添、李志峯、楊三郎、蘇桐等作（編）曲。台北：民聲廣播電台出版、中山出版社發行，1954.02.15。
《歌集》計共收 57 首，外 5 tè 歌（封面裡目錄頁）：〈反共大陸去〉（HG）；〈反共復國歌〉（HG）；文拍作詞、宏文作曲，〈愛國姑娘〉（TG）；何植福作詞（無寫作曲者 ê 名），廣告歌〈何–家胃寶丹歌〉；陳達儒作詞、蘇桐作曲，廣告歌〈結晶味寶歌〉。論歌詞，台語 ê〈愛國姑娘〉是「反共抗俄歌」，speaker 是 cha-bó͘ 人：「為 tio̍h 復興，m̄ -thang 奢華想 beh 粧」、「胭脂水粉 ài 切斷」，觀點有淡薄 á 意思。Ah nā 第 57 首，〈白衣佳人〉（陳達儒作詞、翁志成作曲）kāng 款取 cha-bó͘ 人（看護婦） ê 觀點、做 speaker，有大東亞戰爭 ê 味：「月彎灣照白衣∕行入花園挽薔薇∕初含蕊清芳味∕Beh 送勇士我哥伊」；「伊是愛國 ê 英雄」；「Gún 祈禱武運久∕早日健康往戰場。」He 時代性 nā 有影 lán 讀 ê án-ne，chit 2 首 ê 意識形態有影 saⁿ-ke̍h，敵我矛盾，趣味趣味！
廣告歌 kāng 款展現強烈 ê 時代色彩，mā 是 chit 本歌集 iù-kéng ê 所在。〈何–家胃寶丹歌〉賣藥 á，第二 pha（全歌詞 4 pha）：「發明好藥在世間∕全省 ê 人 to 稱讚∕胃病斷根無為難∕灶君公標胃寶丹」。看藥罐 á 圖，sêng ta̍k-ê khah 知 ê 張國周強胃散，是善德堂製藥廠出品、漢醫何清俊監製；總發賣元，台北廣州街 ê 善德堂中醫診所。〈結晶味寶歌〉是味素廣告；陳達儒寫 ê 詞，第三 pha 前 2 句有 khah hau-siâu（文學）–淡-薄：「原料純真好氣味∕青年食–tio̍h 解相思」。筆者編《台語作家著作目錄》（台南：國立台灣文學館，2015.12），有列 1 條平平陳達儒作詞、蘇桐作曲 ê 歌譜單張〈賣糖果：掬水軒杏仁霜宣傳歌〉（1953 台北市掬水軒公司印本），是國家圖書館 ê 收藏品。Ùi 文資保存 ê 專業意理（pro. ideology）來講，筆者欽服國圖 chiâⁿ 有博物館 ê 水準。
關係《歌集》ê 歷史定位，呂興昌教授 tī FB 肯定 chit 本是「真珍貴 ê 台灣歌謠資料」！專 sak 台語舊歌 ê 廣播人飛虎──曾慶榮，回應歌謠學者黃裕元（Yuyuan Huang）ê FB「分享」，án-ne 講：「這本歌集很寶貴，一般人提到《正聲歌選》、《郭一男歌選》、天成為名主持人阿丁、陳秋和、宋我人、陳星光所出的歌選……，獨漏這本『天聲音樂歌謠研究社歌集』，現終於看到了。」「天聲音樂歌謠研究社應是翁志成先生所辦的。」
我問 kāng 款專家 ê 陳明仁：「阿仁兄，chit 本 kám 有價值？」「有–lah！」「Án-chóaⁿ 有價值？」「內底，有幾首 á 人 khah m̄ 知 ê 歌。」……「Ah to 無 hiah 通行，唱無起–來……」在我 chit ê tòa 巷（行）á 外 ê 人 leh 看，陳明仁 ê 干證有 ha̍h 筆者個人初步 search ê 印象：我 kā 57 tè 歌，1 首 á 1 首 tiàm Youtube gu，三分二，無 tiāⁿ 有四分三 khah ke，chhōe 無歌。Youtube sui-bóng m̄ 是周至 ê 研究方法，m̄-koh thang 成就筆者 ê 假設：Tō 是 iú（you/Youtube）無，chit 本歌集 m̄-chiah koh-khah 有歷史價值。
關係《歌集》ê 內容、hit 57 首歌 ê 紹介，chia 無才調顧 kah kàu。Tú-á 好，kap phú-lo͘h 級 ê 國家圖書館有拚，筆者手頭有收 2 張歌譜。選《歌集》ê 2 首歌來講：1.〈ABC 小姐〉歌詞，二 pha 第 3 句，顏華版「行路活潑好體形」、原詞「一九五三最新型」；四 pha 第 3 句，顏華版「目眉柳葉桃花 chhùi」、原詞「天真活潑笑 bi-bi」。Koh 第四 pha 第 4 句「電髮靡風金紅絲」，顏華 ká-ná 唱「電髮『模仿』金紅絲」，「冒仿」？原詞（《歌集》）pháng 印 tāⁿ–去？筆者手頭有 ê 歌譜散張，是〈ABC 小姐〉作曲者陳錦祥 ê 作品：1951 年陳錦祥作詞、作曲 ê〈孤思嘆〉（油印稿，思–字附人字 pêng），iáu-bōe 出土 ê 台語歌？
2. 林合作詞，〈可愛的結他〉（無印作曲者 ê 名）：「我最可愛的結他∕你是我的寶貝∕聽見你明朗的里儒夢∕解 [著] 我的憂愁∕更深時倚在窓邊∕看見 [著] 清白的月娘∕不覺輕輕奏出懷念的沒樂里」。Chhiàng-sù，筆者有收 khǹg 1 張台北心弦口琴會（開封街 36 號）附設新歌謠講習會 ê 教材散頁〈可愛的吉他〉；頂–á，「結他」印「ギタ」（gita，guitar / gì-tà），「里儒夢」印「リズム」（rizumu，rhythm / li-jú-muh ∕節奏），「沒樂里」印「メロディ」（merodī，melody / me-ló͘-lih ∕旋律），thang 知（假設）：戰後初期，詩人 ê 台語漢字、羅馬字素養，拍算 khah kē 過 in ê 日語、華語素養，éng-éng-pái-pái kō͘ 華語詞（e.g.「結他」）訓用，ah-sī lia̍h 華語漢字（hia̍p 音）tàu 日語借詞。
Chit lō 竹篙 tàu 菜刀 ê 標音法，hō͘ lán 想 tio̍h 戰後初期 ê 台語教材：周漢剛編著，《實用袖珍台灣話一月通》（台北：華光書報社，1949.11.06）；周漢剛編，《國語台語兩用自學手冊》（士林：正聲廣播電台，1950）；第四軍訓班入伍生教導總隊編印（新生報台南印刷廠承印），台華對照本《無師自通台語速成》（1949.12；內頁冊名 :「台灣語讀本（呆萬泥吐本）」）……Hit ê 竹篙 tàu 菜刀，文字「反亂」ê 時代！
