◎蘇晏德
正月十五元宵節
廟口搬戲人真濟
全家備辦圓仔粞
手攑鼓燈來遊街
Chiaⁿ-goe̍h cha̍p-gō͘ Goân-siau-cheh
Biō-kháu poaⁿ-hì lâng chin-chē
Choân-ke pī-pān îⁿ-á-chhè
Chhiú gia̍h kó͘-teng lâi iû-ke
正月十五是上元
全家團圓真溫暖
大大細細來下願
祈求上帝佑台灣
Chiaⁿ-goe̍h cha̍p-gō͘ sī Siōng-goân
Choân-ke thoân-îⁿ chin un-loán
Tōa-tōa-sè-sè lâi hē-goān
Kî-kiû Siōng-tè iū Tâi-oân
正月十五來平溪
十分老街有夠 kheh
下願天燈四界飛
平安喜樂元宵暝
Chiaⁿ-goe̍h cha̍p-gō͘ lâi Pêng-khe
Cha̍p-hun-lāu-ke ū-kàu kheh
Hē-goān thian-teng sì-kè pe
Pêng-an hí-lo̍k Goân-siau-mê
正月十五來鹽水
鹽水蜂炮像霆雷
元宵暗暝有夠媠
親像大開的花蕊
Chiaⁿ-goe̍h cha̍p-gō͘ lâi Kiâm-chúi
Kiâm-chúi phang-phàu chhiūⁿ tân-lûi
Goân-siau àm-mê ū-kàu súi
Chhin-chhiūⁿ tōa-khui ê hoe-lúi
