籃仔

◎六弦琴

大河的頂面

漂流著一腳籃仔

母親靜靜流著目屎

因為伊厝邊的囡仔

喉叫淒慘來無去

伊只有恬恬放互水流

聽候轉來的消息

 

大洋的頂面

漂流著一腳籃仔

母親靜靜流著目屎

因為伊的尪婿及囡仔

無聲無息來無去

伊只有逐冬煮一坩魷魚粥

聽候轉來的消息

 

馬房的內面

囥著一腳槽,成做籃仔

母親靜靜流著目屎

因為有人講伊的囡仔

將來會受釘來無去

伊只有將遮的囥佇心肝底

聽候將來的消息

 

大河的籃仔

孤單佇水面

籃仔內的囡仔

互一個人撿去

此一個

講:「你欲成做我的」

籃仔底,有了

無仝款的頭毛

真仝款的皮膚

仝一款的語言

總是,伊是伊家己的

 

大洋的籃仔

孤單佇水面

籃仔內的囡仔

互真多人撿去

每一個

攏講:「你是我的」

籃仔底,有了

真多色的頭毛

真多色的皮膚

真多款的語言

總是,伊是伊家己的

 

槽所成的籃仔

孤單佇地面

籃仔內的囡仔

互真多人注目

每一個

攏問:「你豈是我的」

籃仔底,有了

真多種的思想

真多款的體驗

仝一款的真言

總是,伊是伊家己的

 

美麗的籃仔,孤單

受趕佇靜默中

受侵犯佇靜默中

受刣佇靜默中

受棄捨佇靜默中

 

活命的籃仔,堅強

佇靜默中,硬頷仔頸

佇靜默中,咬嘴齒根

佇靜默中,等出頭天

佇靜默中,相及相攬

 

籃仔,晟養著生命

佇衝突,佇餒罵

佇受騙,佇看破

佇看衰,佇擾亂

佇攑頭,佇徛起

 

伊是伊家己的籃仔

及無法度出聲的人徛起

做伙流目屎

受鞭打

憂傷艱苦

了後

伊看著一屑仔向望

勻勻仔

    puh芛

廣告/聖經充滿我-經文填充本

我有話要說