生命 ê 屈勢──我讀胡長松《柴山少年安魂曲》

30
胡長松《柴山少年安魂曲》

◎陳金順

胡長松,1973年出世佇高雄內惟。1995年起,佇宋澤萊主編 ê《台灣新文學》發表創作,踏出伊佇文壇 ê 頭一步。2000年起,全力投入台語文學,成做一枝時時出泉 ê 利筆。現此時,擔當《台文戰線》社長兼總編輯。

《柴山少年安魂曲》是胡長松 ê 頭一本冊。代起先由草根出版公司佇1997年上市,無幾冬後,這本華語長篇小說就佇茫茫冊海裡絕版。20冬後,2017年2月由原公司佮高雄市政府文化局合作重新出版、再現江湖。

這本予宋澤萊謳咾是「新鄉土文學傑作」ê 小說,到底是咧寫啥物?簡單講,就是咧寫中下階層少年囡仔 ê 哀歌。

規篇小說用第一人稱敘述。作者設計主角杜天勇 ê 朋友K君這个代言 ê 角色,予故事頭尾 ê 語言有加較多層次 ê 變化。若無,全然叫一个tshit迌囡仔跳出來講話,大概誠歹跳脫咱所認知 ê 一色氣口。

杜天勇出身高雄柴山一个破敗 ê 家庭。雖罔祖先以早發達,毋過歹事做盡,煞咒懺著囝孫,予怹佇咧拖屎連。天勇仔 ê 老爸就是一个顯例,規世人正經代誌無半撇,干焦嫖、賭、飲上蓋在行。人講:「有樣看樣,無樣家己想。」佇這款環境大漢 ê 囡仔,你想會當偌長志咧?

杜天勇自小學起就歹囝浪蕩,冊毋讀無打緊,冤家相拍使鱸鰻癖絞群結黨。國中以後閣較免講,毋但佮老爸仝款嫖、賭、飲件件皆能,連刣人嘛嶄然仔紲拍。落尾,錯手刣死老爸 ê 夥計,入監聽候銃決。

故事大約講到遮,詳細情節暫且按下。紲落來人物部分,除了杜天勇爸囝以外,伊 ê 老母嘛是內中重要 ê 角色。這个生活佇破敗漁村 ê 苦命查某人,一世人無得著翁婿 ê 疼痛,為家庭對死 ê 做倒轉來,最後真正自殺離開世間。

猶閣一个重要 ê 女性人物,是杜天勇 ê 姼仔阿枝。愛著較慘死,阿枝為著勇仔放棄學業,綴伊稅踮暗毿 ê 房間,甚至墜落煙花趁錢設緣投。落尾,伊對勇仔慼心離開,一去不回頭。

另外,次要人物部分,有杜天勇 ê 小妹,自細漢死忠兼換帖 ê 簡達章佮盧文彬,老爸的夥計等。

這篇小說 ê 人物無濟,不而過,佇搬戲師胡長松巧妙搬演之下,逐个角色攏演甲不止仔上腳。

佇場景描寫頂面,胡長松嘛無失讀者 ê 禮。伊共柴山四箍輾轉 ê 自然景緻,無論海岸、山壁,抑是庄頭、聚落,一筆一筆勻勻仔寫落來,袂輸一張閣一張 ê 烏白相片,遐爾仔真拄真,重現昔日 ê 地誌。

總講一句,《柴山少年安魂曲》是一本值得謳咾推薦 ê 好小說。啥物號做好小說?除了用作者書寫人物、場景、情節 ê 能力來檢驗以外,一般讀者若是感覺這本小說會一直想欲讀落去,無讀煞毋願食飯、歇睏,按呢大概就一必一中矣。當該然,恁若欲用這款標準去檢驗大眾小說,未必然袂使。

20冬前袂赴讀《柴山少年安魂曲》ê 朋友,請趕緊行動,用閱讀來支持優質 ê 文學創作。這是一个現代公民該當有 ê 修養。

我有話要說