南科實驗小學╱指導老師◎陳金順
台灣 ê 熱天
作者◎蘇誠宇
熱天日頭赤炎炎
剉冰一碗閣一碗
食落心情真快活
七月八月風颱天
透風落雨攏綴你
暑假出門愛細膩
台灣水果第一甜
西瓜檨仔紅肉李
王梨龍眼佮荔枝
熱天出門看風景
有山有海有花蕊
台灣寶島真正媠
台南永康國小╱指導老師◎蘇晏德
愛
作者◎ 陳佳妡
愛親像沙仝款
風一吹就散–去
愛親像玻璃仝款
摔一下就 pit–去
愛親像紙仝款
liah 一下就破–去
愛親像爸母仝款
予阮倚靠
愛親像老師仝款
予阮智識
愛親像厝仝款
予阮溫暖
愛親像 phia̍t（寵物）仝款
予阮生活有趣味
愛有時予人想攏無
台語課
作者◎郭于嘉
我上合意講台語
台語課程真趣味
老師教阮羅馬字
教阮寫詩有意義
逐家認真練寫詩
台語台語我愛你
寒天
作者◎林庭寬
寒天恬恬來 ah
伊帶來 chǹg 骨寒風
山頂也降落白雪
毋過也帶來淒涼
伊嘛真厲害
會當予萬物靜靜 teh 睏
也會當予河川結冰
寒天伊帶走花草佮樹木
伊是一年 ê 煞尾
也予世界 ê 萬物
有一 ê 歇睏 ê 時陣
予辛苦 ê 人
有放鬆 ê 時刻
毋過也帶來寒流
予人有無爽快 ê 感覺
寒天 m̄ 知是好是 bái
四季
作者◎紀欣妤
春天 peh 山郊遊真歡喜
大人囡仔來看歌仔戲
夏天泅水食冰好滋味
路邊夜市擔仔滿滿是
秋天欣賞落葉真趣味
大大細細耍 kah 足滿意
冬天火鍋圍爐笑微微
山頂白雪降落足新奇
天頂佮雲
作者◎林郁晴
雲是天頂 ê 魔術師
為天頂畫上色彩
共天頂裝甲 hiah-nī 媠
出日 雲白白親像棉仔糖
這時 天頂親像一片海洋
予人想飛到天頂佮雲耍
落雨天 雲烏烏
天頂親像一塊烏布
烏色 ê 天頂親像悲傷人 ê 心
天頂佮雲有真濟款變化
逐款攏予人有真濟幻想
百貨公司
作者◎何以晨
百貨公司真趣味
食 ê 用 ê 滿滿是
有菜有肉嘛有魚
濟濟新奇 chhit-thô 物
也有人咧變把戲
也有人咧唸歌詩
逐家看 kah 足歡喜
生活有伊真便利
台南
作者◎黃筠婷
古都台南足稀奇
古蹟四界滿滿是
孔廟古城有古味
傳統料理上合味
暗時 chhit-thô 去夜市
花園夜市你愛去
交通方便有高鐵
台南真有人情味
遊澎湖
作者◎蘇棨崡
一二三四五
坐船到澎湖
歡喜來散步
海產食落肚
愈食愈大 kho͘
無法度 láng 褲
傷重栽落塗
有氣無地吐
Peh 山
作者◎歐晏綾
春天 peh 山花滿是
多采多姿鳥隻啼
熱天 peh 山熱欲死
薁蕘檸檬退火氣
秋天 peh 山來吟詩
唸 kah 順喙無人比
冬天 peh 山冷吱吱
為著身體做伙去
透早
作者◎籃翊慈
春天 ê 透早
有鳥仔 teh 啼叫
熱天 ê 透早
有日頭 teh 叫阮起床
秋天 ê 透早
有樹葉仔飛來飛去
寒天 ê 透早
有冷風予阮寒甲毋願起床
假日 ê 透早
阮會不知不覺睏到中畫
平日 ê 透早
千萬袂當睏過頭
緊起床 洗喙 洗面 換衫
因為透早是咱一日 ê 開始
我 ê 阿公
作者◎江佳雯
我 ê 阿公真兩光
智識啥物攏袂通
透早起床烏白摸
中晝袂記食便當
下暗欲看孫悟空
寒天海邊搧海風
看來真正是空空
毋過阿公真健康
遊山玩水
作者◎林誼婷
水沖懸懸心敬畏
心情無好會安慰
樹仔草仔真青翠
花蕊妖嬌嘛食虧
袂當展伊 ê 高貴
青山綠水有智慧
揣來清風佮溪水
日頭活力現光輝
美麗台灣 ê 四季
去到佗位攏媠氣
地球
作者◎陳韡昕
地球是逐家 ê 兜
地球上有真多濟生物
但是逐家攏無做好環保
著會造成全球暖化
可能會予逐家活袂落去
所以咱愛做好環保
才有健康 ê 身體佮地球
予咱有健康 ê 土地佮海洋
人才會當快快樂樂活落去
熱天 ê 海沙埔
作者◎董宸妤
熱天逐家愛耍水
海邊風景有夠媠
大人囡仔組一隊
全家做伙耍沙堆
囡仔實在真古錐
大人笑甲喙開開
老人啉茶講是非
阮攏枵甲搶座位
台南仁德區文賢國小╱指導老師◎蘇晏德
白紙
作者◎張斯涵
白 sut-sut ê 紙啥物攏無
筆一寫落去頂面就有字
Kā 阮 ê 心聲寫–落去
白紙就親像 bē 講話 ê 人
靜靜倒 tī-hia
Teh 聽我講學校 ê 代誌
伊全部攏會記 tī 心肝內
伊上了解我 ê 心
了解我 ê 煩惱
因為伊是我永遠 ê 朋友
台灣
作者◎施心鏸
台灣濟濟好風景
遮 ê 人民真熱情
台北鬧熱西門町
台中新社賞花景
台南古蹟佇安平
高雄大船佇遮停
花蓮麻糬好風評
欲來台灣阮歡迎
我 ê 家人
作者◎曾幃意
阮兜 ê 人有夠濟
阿公做穡逐項會
阿媽皮膚有夠白
阿姊古錐閣美麗
平時愛穿懸 tah 鞋
小弟厚話閣真矮
逐工佮我 teh 冤家
小妹最近 tú 好生
In 是我 ê 天佮地
我 ê 家
作者◎陳昱錚
家是我出世 ê 所在
厝內 ê 人是我 ê 至愛
啥物代誌攏為我安排
毋管食穿用攏足豐沛
生活自由閣自在
逐工過 kah 真爽快
阿公種菜上厲害
阿媽興趣是煮菜
阿爸是起厝 ê 大師
若阮阿母上 sai-nai
阿兄是舞笑 ê 天才
予阮全家笑 hai hai
厝
作者◎林恩瑄
厝 是阮 ê 靠山
毋管風吹日曝
伊攏 tiām-tiām khiā 佇遐
伊是我上好 ê 伴
是阮永遠 ê bih 風港
厝 伊足真誠 bē 虛偽
毋管阮按怎蹧躂
伊攏無怨言
阮兜 ê 大大細細
攏真愛這間溫暖 ê 厝
