◎姚志龍
數念 親像線球
那想 那抽
抽袂盡
一直抽
囡仔時代 無憂愁
少年時 濟濟要求
青春時 妖嬌幼秀
老來疏疏的 白頭毛
Siàu-liām chhin-chhiūⁿ sòaⁿ -kiû
Ná siūⁿ ná thiu
Thiu bē chīn
It-ti̍t thiu
Gín-á sî-tāi bô iu-chhiû
Siàu-liân sî chē-chē iau-kiû
Chheng-chhun sî iau-kiau iù-siù
Lāu–lâi se-se ê pe̍h thâu-mn̂g
記持 親像線球
泡一杯茶
慢慢仔抽
慢慢仔想
日子親像箭 siú siú siú
當時為家庭 毋敢休
現在已經 欲退休
阿母的尻脊 煞勼勼
無閣夯箠仔 大聲咻
Kì-tî chhin-chhiūⁿ sòaⁿ -kiû
Phàu chi̍t-poe tê
Bān-bān-á thiu
Bān-bān-á siūⁿ
Ji̍t-chí chhin-chhiūⁿ chìⁿ siú siú siú
Tong-sî ūi ka-têng m̄ -káⁿ hiu
Hiān-chāi í-keng beh thè-hiu
A-bú ê kha-chiah soah kiu-kiu
Bô koh giâ chhôe-á tōa-siaⁿ hiu
歲月啊 歲月
阿母 已經離開
身影 不復見
佇腦內 浮現
伊留落的 印記
親像 大大粒線球
乎我不時 恬恬仔想
靜靜仔抽……
Sòe-goa̍t–ah sòe-goa̍t
A-bú í-keng lī-khui
Sin-iáⁿ put-hiù kiàn
Tī náu-lāi phû-hiān
I lâu–lo̍h-lâi ê ìn-kì
Chhin-chhiūⁿ tōa-tōa lia̍p ê soàⁿ-kiû
Hō͘ góa put-sî tiām-tiām-á siūⁿ
Chēng-chēng-á thiu……
