◎蘇晏德
阿母的愛上蓋媠
親像春天的花蕊
阿母點滴的恩惠
親像甘甜的露水
A-bú ê ài siōng-kài súi
Chhin-chhiūⁿ chhun-thiⁿ ê hoe-lúi
A-bú tiám-tih ê un-hūi
Chhin-chhiūⁿ kam-tiⁿ ê lō͘-chúi
阿母無私閣慷慨
親像月娘遐可愛
阿母對人好款待
親像良善的天使
A-bú bô-su koh khóng-khài
Chhin-chhiūⁿ goe̍h-niû hiah khó-ài
A-bú tùi-lâng hó khoán-thāi
Chhin-chhiūⁿ liông-siān ê thiⁿ-sài
阿母貼心閣溫暖
予阮全家足安全
阿母辛苦無埋怨
予阮感覺無平凡
A-bú tah-sim koh un-loán
Hō͘ goán choân-ke chiok an-choân
A-bú sin-khó͘ bô bâi-oàn
Hō͘ goán kám-kak bô pêng-hoân
阿母笑容像春風
予阮事事攏亨通
阿母個性真開朗
予阮精神足清爽
A-bú chhiò-iông chhiūⁿ chhun-hong
Hō͘ goán sū-sū lóng heng-thong
A-bú kò-sèng chin khai-lóng
Hō͘ goán cheng-sîn chiok chheng-sóng
