◎李南衡
今年（2017）2 月初 7，《自由時報》報導，「華盛頓公約」第 17 屆大會完全禁止穿山甲國際貿易 ê 決議，今年 1 月初 2 正式生效。有中國學者感慨講，中華穿山甲早 tio̍h 佇中國 hông 食 kah 臭青荒去 ah，想 beh 研究 mā 無可能。好佳哉，咱台北市動物園「芎梧」，是第一隻人工方式哺育大 ê 中華穿山甲，技術「驚動國際」，舊年有送出一公一母 ê 中華穿山甲「水裡」kah「穿芎」去德國萊比錫（Leipzig）動物園，希望透過台北動物園 ê 成功經驗，hō͘ 直直 beh 斷種 ê 中華穿山甲會 tàng 佇德國順利繁殖，穩定穿山甲佇歐洲 ê 域外保種族群。
老一輩 ê 台灣人 m̄ 知穿山甲是啥物，但是我 kā 一位老先生講是「鯪鯉」，伊隨時應講：「假死鯪鯉，當狗蟻。（Ké sí lā-lí, tng káu-hiā.）」伊說明講：Chit 句台灣俗語話是講，平常時鯪鯉歸身軀 ê 甲攏合 teh，伊恬 chiⁿ-chiⁿ 攏 bē tín 動是假死。「當（tng）」ê 意思是用計智抑是器物等待 beh 掠 ê 對象。鯪鯉假死 ê 時，歸身軀的甲會半掀開，發出特別 ê 氣味抑是甜 ê 分泌物，siâⁿ 狗蟻khîⁿ 倚來，等到真濟狗蟻當爽 ê 時，鯪鯉 ê 甲片作一下合起來，所有 ê 狗蟻攏挾佇甲內底，過一時仔鯪鯉才 kā 一片一片 ê 甲掀開來，吐長嘴舌食狗蟻，狗蟻 tio̍h 按呢爽爽仔死去。
老先生講，我用人作例來講可能會 khah 清楚。1988 年 1 月 13，蔣經國總統死去，照憲法規定由副總統李登輝繼任總統。當時一寡中國國民黨 ê 大老攏認為李登輝是一個 kah 嚴家淦仝款 ê 古意人，完全無 kā 伊看在眼內。李登輝一下發出「權力 ê 芳味」，當然會 siâⁿ 大細粒官 khîⁿ 倚去。李登輝先 kā 中國國民黨秘書長李煥調離黨中央、由伊親信 ê 宋楚瑜接手，任命李煥去作行政院長，李煥真爽；同時 kā 萬年參謀總長郝柏村升作國防部長、半年後 kā 抵抵作滿一年行政院長 ê 李煥換落來，任命郝柏村作行政院長、郝柏村真爽，郝柏村爽爽中完全失去軍權，啥人講「萬年參謀長無人有法伊」？
雖然有學生教授靜坐示威抗議軍人干政，但是李登輝猶原 hō͘ 郝柏村作 2 年 8 個月 ê 行政院長；派親信宋楚瑜去作台灣省主席，一年外第一遍民選當選台灣省長，宋楚瑜真爽；直接民選 ê 宋省長直直 beh 比國大代表選出 ê 李總統 koh khah chhèng。一寡 hō͘ 李登輝挾無死 ê 中國國民黨 ê「非主流派」，tī 1996 年第一遍民選總統 ê 時，有幾組出來競選，李登輝高票當選總統，會使講是藉台灣人 ê 力 kā in 挾死 kah 寸草不留。兩年後 ê 1998 年 12 月初 4，李總統 kā 台灣省廢掉，宋省長 hō͘ 李總統 ê 甲活活挾死。
老先生講了，我才真正明白狗蟻是按怎死去 ê。問題是，chit-má 台灣 ê 少年人連鯪鯉是啥物都 m̄ 知，「假死鯪鯉，當狗蟻」chit 句台灣俗語那有可能傳落去？
