◎蘇嘉祺
猶 koh 到分 koh-活卵 ê 日子，逐年koh-活節 ê 前後，我 ê 心想起往事就淡薄仔艱苦。3年前 ê 彼一工，天猶未光 ê 禮拜日，翁婿接著一通電話，阮兩个人就緊張對台北一路無停駛車轉去彰化。
規路攏是車，阮 ê 心嘛若拍結，彼當時干焦知影大官 kap 大家（ta-ke）出車禍，煞 m̄ 知撞 kah 偌嚴重。到彰化 ê 病院門口，厝邊無張持共阮講，阮大家已經無效去矣、過身矣，彼時陣我 ê 心感覺像予刀割一痕，目屎㴙㴙滴，流袂停。
人過往以後 ê 日子才是現實 ê，大家過身了後，阮拄著誠濟無合理 ê 代誌，嘛加捌著人情冷暖，有時陣用講 ê 嘛無法度予我內心克虧 ê 代誌吐憐涎，尤其是彼當時翁婿 ê 工課定定愛值班，我常在是一个人 tī 厝，日頭落山 ê 希微駐 tī 我 ê 心肝底強欲袂喘氣。
3冬過去矣，時間講長無長，講短無短，猶-m̄ -koh 感受著人情世事已經有夠額。錢誠?予人僥心，徛算講是上親 ê 人，嘛誠僫保證講會對咱好；雖然代誌已經過去矣，m̄ -koh 自3年前 ê 彼工開始，就已經改變我 ê 信仰 kap 誠濟想法。好佳哉我愛畫圖，會當逐工共我 ê 悲傷 kap 快樂，用畫筆攏吐吐出來，這嘛算是萬幸啦！
「三十年河東，三十年河西。」時間會替你濾出上真 ê 感情，年月日子會 chhōa 你體會上深 ê 世情，雖然 tī 落雨 ê 暗暝 koh 予我想起這段 m̄ 願想起 ê 記持，害我無眠，m̄ -koh 我猶原感恩上帝賞賜予我 ê 思典有夠額。
