文圖◎林欣愉
阿飛愛揀食1。
逐擺若看著食飯桌仔頂出現五花十色êê菜蔬，伊攏會憂頭結面。
伊m̄愛食ê菜蔬百百款：
伊m̄愛食茄仔，伊講：「若食茄仔，我ê喙齒會變做茄仔色！」
伊m̄愛食花菜，伊講：「若食花菜，我ê頭毛會佮花菜仝款拍結球！」
伊m̄愛食苦瓜，伊講：「若食苦瓜，我ê喙䫌2會佮苦瓜仝款生粒仔！」
伊m̄愛食金瓜，伊講：「若食金瓜，我ê身軀會親像金瓜仝款圓kún-kún！」
伊m̄愛食荷蘭豆，伊講：「若食荷蘭豆，我ê目睭會親像豆仔仁仝款細粒！」
伊m̄愛食青大同仔，伊講：「若食青大同仔，我腹肚內底ê腸仔會變做青色！」
伊m̄愛食紅人蔘仔，伊講：「若食紅人蔘仔，我ê面會親像紅人蔘仔仝款瘦閣長！」
阿飛ê阿母佮阿爸，講也講矣、罵也罵矣，嘛是攏無效。阿飛家己一點仔攏無要無緊。
一直到有一工透早，阿飛起床準備欲洗面洗喙，伊看著鏡內面，煞發現，伊歸身軀ê色水攏無去矣！M管是烏金烏金ê頭毛，抑是紅紅ê喙脣，m̄管是喙抑是目睭，所有色水攏無去矣！
伊惙一趒3，目屎隨liàn落來。猶m̄過，伊嘛是愛去學校讀冊。伊共歸身軀用衫包乎牢，閣戴帽仔、掛喙罨4才去學校，真無簡單才忍耐到放學。
轉來到厝，阿飛趕緊傱去揣阿母討救兵，煞看著阿母已經老神在在咧煮暗頓，假那早就知影伊發生啥物代誌仝款。
阿母共阿飛講：「你就是愛揀食，才會歸身軀ê色水攏無去，你若是共我煮ê魔法料理食乎完，就會當復原！」
阿飛聽著，隨共阿母煮ê茄仔、花菜、苦瓜、金瓜、荷蘭豆、青大同仔、紅人蔘仔食到清氣溜溜。無偌久，伊歸身軀ê色水攏恢復矣！頭毛猶閣是烏金烏金，喙脣佮喙䫌嘛紅芽紅芽、氣色好。
從今以後，阿飛m̄敢閣愛揀食矣，m̄管是菜蔬抑是魚仔佮肉，伊攏會食到清氣溜溜。
1 揀食，kéng-chia̍h，挑食。
2 喙䫌，chhùi-pé，臉頰。
3 惙一趒，chhoah-chi̍t-tiô，嚇一跳。
4 喙罨，chhùi-am，口罩。
