再現飛番傳奇──我讀陳榕笙《麻達快跑》

《麻達快跑》封面

◎陳金順

陳榕笙,1979 年出世,蹛佇台南佳里。寫作文類主要以短篇小說佮兒童文學為主。捌得過南瀛文學獎短篇小說佮兒童文學首獎、府城文學獎短篇小說正獎等濟濟文學獎。現此時擔任閱讀寫作教學工課,同時兼任台灣文學創作者協會秘書長。
2017 年 4 月出版 ê《麻達快跑》,是一本 4 萬外字 ê 華語中篇少年小說。因為是少年小說,所致文字 ê 使用頂面,大體上不止仔口語化,規本冊自頭讀到尾,短短幾點鐘就會當全然了解故事 ê 內容。
這本小說以古早 Siraya 族蕭壟社 ê 飛番傳奇成做肥底,作者透過有限 ê 資料加上無限 ê 想像,所激出來 ê 一甕甘醇好落喉 ê 芳酒。
佇咱佳里北頭洋地頭,確實有一座「飛番墓」,墓主就是 Siraya 族 ê 程天與、程國泰父仔囝,聽講怹佇大清帝國乾隆皇帝 ê 時,捌受召見千里迢迢來到北京表演走標特技。
號做特技,當該然就毋是普通 ê 敖走爾爾。設使傳說是真拄真 ê 代誌,程天與若出世佇現此時,絕對會當破世界紀錄,佇奧運會提金牌。牙買加 ê 波爾特佮馬拉松 ê 冠軍,恐驚攏毋是伊 ê 對手。
未滿 40 歲 ê 小說寫手陳榕笙,鑽入歷史資料 ê 空縫佮掠著傳說 ê 鋩角,發揮伊無所不至 ê 虛構能力,起造一座自然 ê 鄉土文學教室。踮這座學堂裡,無論小朋友、大朋友,攏聽好自由出入,行踏幾百冬前 ê Siraya 現場。
《麻達快跑》ê 主角號做焦力烈,伊是蕭壟社第一敖走 ê 少年。伊 ê老爸沙賴少年 ê 時是部落 ê 英雄,名聲一點仔都無輸伊。毋過,倚近中年 ê 沙賴煞變甲無攬無拈,兩爸仔囝 ê 觀念嘛嶄然仔無仝。
焦力烈搪著漢人千總李岩,是規個故事產生轉踅 ê 關鍵。李岩奉閩浙總督命令,愛佇台灣府走揣「番社奇人異士」。面頭前這個少年麻達焦力烈,拄好符合頂面 ê 條件。
落尾,經過李岩 ê 考驗,沙賴、焦力烈爸囝,參另外 5 位 Siraya 族親,由李岩領隊,一路來到北京,按算欲佇皇帝面頭前展現走標特技。啥知,來到京城 ê Siraya 人,等待十外日才見著皇帝。皇帝雖罔賞賜怹袂少財寶,毋過,終其尾並無喊怹表演走標特技。
這款結局,沙賴感覺無蓋受尊重,顛倒伊 ê 後生焦力烈看較開,尚且對一路走來 ê 過程得著體悟。
除了頂面幾位主要人物以外,Siraya 故事袂當欠缺 ê 尪姨,佇適當 ê 情節裡現身幾落擺。另外,少女貓霧是焦力烈青梅竹馬 ê 愛人,雖罔出場機會無濟,毋過是規本小說裡一個美麗 ê 存在。特別是佇 6 位 Siraya 走標隊欲對大員港出發去唐山 ê 坎站,貓霧雄雄變裝出現,要求綴怹上京赴會。這項看起來小小 ê 設計,佇筆者眼內是本冊作者偷偷仔展現 Siraya 母系社會對女性 ê 致重。當該然,若無彼位另類 ê 漢人官員李岩,貓霧檢采無機會上船出航。
總講一句,《麻達快跑》是一本好看 ê 小說。如今,平埔族群 ê 議題漸漸受社會注目,這幾冬來書寫平埔 ê 小說一本一本出世。筆者佇遮向逐家推薦這本小說,讀看覓恁就知我講 ê 攏有影有跡。

廣告/美好腳蹤368認購

我有話要說