文圖◎張家榮
【看圖講福音】馬太福音19章21～35節
有一日，門徒彼得對耶穌講：「主啊！我 ê 弟兄得罪我，我 ài 饒恕伊幾擺？七擺 kám 會當？」耶穌講：「我 kā 你講，m̄ 是七擺 niâ-niâ，是七十个七擺。」
1.耶穌講，天國就好親像一个王 beh kap 伊 ê 僕人算 siàu。
2.有一工，僕人 chhōa 一个欠一千萬兩銀 ê 人來到王遐，beh 叫這个人還錢，m̄-koh 這个人啥物 lóng 無，一銑五釐 mā 提 bē 出來。
3.這个時陣，主人就吩咐僕人，將此人 ê 某 kap 囝兒，hām 伊所擁有 ê 一切，lóng 總提去賣掉 tú siàu。
4.欠錢 ê 一聽主人 án-ni 講，隨驚 kah 跤手 phî-phî-chhoah，當場軟跤跪落去講：「主啊，請你寬容我，欠你 ê 錢將來我 tiāⁿ-tio̍h 還清。」這時，主人動了慈心，m̄ -nā 將伊釋放，koh 赦免伊所欠 ê 債。
5.就 án-ni，僕人白白得著赦免了後，有影是心涼脾肚開，歡喜 kah 喙笑目笑。
6.無想 tio̍h，tī 路裡 teh 行 ê 時陣，拄好 tn̄g-tio̍h 一个欠伊十兩銀 ê 人，伊 hām 想 mā 無想，隨激一副歹面腔向 hit 个人討錢。可憐 ê 是，此人嶄然散赤，根本無錢通還伊。
7.所致，散赤 ê 伊只好 kā 磕頭拜託，講：「請你寬容我，欠你 ê 十兩銀將來我 tiāⁿ-tio̍h 會還。」
8.汰會知，這个僕人心肝有夠 bái，m̄ -nā m̄ 肯寬容人，koh 當眾人 ê 面 kā 蹧躂、phi-siùⁿ kah 無一塊好。上 kài 使人受氣 ê 是，伊竟然為 tio̍h 十兩銀，將 hit 个人掠入去監獄。當時，chē-chē 人看見這件烏漉肚 ê 事件，逐家心內 lóng 真怨 chheh，替 hit 个散赤人抱不平。
9.鬱卒！可憐 ê 散赤人無想 tio̍h 會為 tio̍h 十兩銀 hông 掠去關，心肝內是 ak-chak kah 強 beh 死，一个面懊嘟嘟，煩惱 kah 目頭目結。
10.後來，有善心 ê 僕人將這層代誌講 hō͘ 主人知，講早前 hit 个欠一千萬兩銀 ê 人如何失德，無憐憫心 kā 人逼殺……。
11.主人聽 tio̍h 這款歹心代，連鞭氣 kah 一个面 piⁿ-piⁿ-piⁿ，隨吩咐人去 kā 叫來，氣怫怫對伊講：「你這个罪孽 ê 惡奴才，你求我寬容你，我就無 kap 你 khêng-hūn，赦免你所欠 ê 債，kám 講你無應該憐憫你 ê 兄弟，就親像我憐憫你相像 mā？」
12.就 án-ni，主人一氣之下，將伊交 hō͘ 掌刑 ê，beh 等伊還清所欠 ê 一千萬兩。
X X X
主耶穌講：「恁各人若無 ùi 心內饒恕你 ê 兄弟，我天父 mā beh án-ni 對待恁。」
哈利路亞！感謝主耶穌基督 ê 憐憫，無計較咱過去所虧欠 ê，饒恕咱無限 ê 七擺，hō͘ 世人因為伊 ê 愛 kap 伊 ê 疼，有一个愛別人、原諒人、饒恕人 ê 好模樣。謳咾感謝主！
