好好鱟刣 kah 屎流

Photo credit: rubyblossom. / CC BY-NC-SA

◎李南衡

阿福伯90 ah,身體猶真勇健、精神好、頭殼真清楚。每早起一定去市立圖書館,看兩三份報紙了才有轉去厝裡。前日 ùi in 門口過 hō͘ 伊看 tio̍h,ia̍t 手叫我入去。伊氣 phu̍t-phu̍t、大細聲罵蔡英文政府 gâu 拖沙、做代誌無 at-sá-lih。
伊講,年金改革一定tio̍h 做,連中國國民黨馬英九作總統 ê 時 to̍h 講:年金改革 chit-má 無做,以後會後悔。伊干單會曉出一枝嘴,蔡英文總統上台隨時做,派陳建仁副總統擔任年金改革委員會召集人,誠好 ah!陳副總統 chit 個讀冊人傷古意,講 beh hō͘ 無仝款主張 ê 人充分發表意見,真好 ah!但是一個委員會開4、5遍所有 ê 意見差不多攏講出來 ah,何必開20遍?Hit 幾個人佇電視頂面那像曲盤跳針一再講仝款 ê 話,舞歸半年才開北中南東四個分區會議、年金改革國是會議。年金改革委員那會 bē 曉製作各種圖表、道具來說明咧!
逐個攏知影年金若無改革,15年內各種基金攏會破產。小數人講 in 無反對年金改革,但是,有人講年金改革 bē 使損害 tio̍h in ê 尊嚴;有人講 bē 使改革 tio̍h in;有人講政府應該遵守信賴保護原則、早前政府答應 in ê、in 應該得 ê 一角銀都 bē 使去角。
年金改革委員會做代誌無重點。應該先講清楚 18% beh 按怎、分作幾年廢除,逐個 mā kā 拍噗仔。才講中國國民黨一寡大官小官以前「黨職併公職年資」,beh 按怎清算、加領去 ê 錢按怎叫 in 吐出來,逐個 mā kā 拍噗仔。才講各種年金 ê 天房 kah 地板佇叼位,上懸會 tàng 領偌濟、上低會 tàng 領偌濟,講 hō͘ 清楚,逐個 mā kā 拍噗仔。年金改革委員會腳手慢鈍做代誌 chiah 呢拖沙、無夠殺,致使 chiah 呢好 ê 政策舞 kah 出現各種怨言、遊行抗議。有影是「好好鱟刣 kah 屎流(hó-hó hāu thâi kah sái lâu.)」,真無彩。
我緊請教阿福伯 chit 句台灣俗語話是啥意思?阿福伯解說講,「鱟」的頭、尻脊 phiaⁿ kah 腹肚攏是 tēng 殼,一枝長尾那像劍。鱟通常是公母相隨無棄無離。今仔日咱台灣漁民掠 tio̍h 鱟會緊放轉去海裡,但是咱台灣先民應該是定定食,才會留落來一寡 kah 鱟相關 ê 俗語話,上有名 ê chit 句「好好鱟刣 kah 屎流」,意思是講足難得掠 tio̍h 好食 ê 鱟,刣 kah 屎流、歸隻鱟攏臭 mo-mo tio̍h tàn 掉。聽講 gâu 處理鱟 ê 人,先 kā 鱟下佇冷水 ê 鼎底,火慢慢加熱到一個熱度,鱟擋 bē tiâu、屎歸個 chōaⁿ 出來,才 kā 鱟掠起來刣作料理。因為有殼包 tio̍h 所以 bē 影響 tio̍h 肉。早前猶無 su-tián-lè-sù ê 杓仔,上好 ê 是用鱟 ê 殼來作「鱟杓」。
連我 chit 號70外歲 ê 人都 m̄-bat「好好鱟刣 kah 屎流」chit 句台灣俗語話,日後 ê 台灣人 beh 理解 chit 句俗語話,應該相當困難。

我有話要說