現代所多瑪?

進入哥本哈根
市政廣場附近大街小巷
路 nih 攏是糞圾 紙坯
酒矸仔 薰頭仔 暗毿又濕澹
薰味 酒味 大麻味
一直擤對鼻仔
這是啥情景

Chìn-ji̍p Ko-pún-ha-kun
Chhī-chèng kóng-tiûⁿ hū-kīn tōa-ke sió-hāng
Lō͘-nih lóng-sī pùn-sò chóa-phoe
Chiú-kan-á hun-thâu-á àm-sàm iū sip-tâm
Hun-bī chiú-bī tōa-môa bī
It-ti̍t chhèng tùi phīⁿ-á lāi
Che sī siáⁿ chêng-kéng

一大陣人 旗仔披佇肩甲
貼佇面仔佮身上
插佇頭殼頂 車頂
縛佇 上明顯的角落
原來是大聚集 大遊行
音樂 像雷公 pin-pin pòng-pòng
起酒肖的 蹁來蹁去

Chi̍t tōa-tīn lâng kî-á phi tī keng-kah
Tah tī bīn-á kap sin-chiūⁿ
Chhah tī thâu-khak téng chhia-téng
Pa̍k tī siāng bêng-hián ê kak-lo̍k
Goân-lâi sī tōa chū-chi̍p tōa iû-hêng
Im-ga̍k chhiūⁿ lûi-kong pin-pin pòng-pòng
Khí chiú-siáu–ê phîn-lâi phîn-khì

忽然 若親像
行入 所多瑪城
查埔的 奇裝異服
查某的 ná 真快樂
綴音樂 搖袂停
觀光客 趕緊牽絚絚
過路人 綴咧搖頭

Hut-jiân ná chhin-chhiūⁿ
Kiân ji̍p Só͘-to-má siâⁿ
Cha-po͘–ê kî-chong īⁿ-ho̍k
Cha-bó͘–ê ná chin khoài-lo̍k
Tòe im-ga̍k iô bē-thêng
Koan-kong-kheh kóaⁿ-kín khan ân-ân
Kòe lō͘ ê lâng tòe leh iô-thâu

警察佇路頭
尊重你的人權
尊重你的行為
請你嘛
尊重社會規矩
尊重別人感受
有好的模樣

Kéng-chhat tī lō͘-thâu
Chun-tiōng lí ê jîn-koân
Chun-tiōng lí ê hêng-ûi
Chhiáⁿ lí mā
Chun-tiōng siā-hōe kui-kí
Chun-tiōng pa̍t-lâng kám-siū
Ū hó ê bô͘-iūⁿ

我有話要說