咸豐三,講到今!

◎李南衡

前幾工,阮查某子 ê 契母問我:「阮阿爸定定講『咸豐三,講到今(hâm-hong saⁿ, kóng kàu taⁿ)。』我聽幾十年 m̄ 知啥意思,等到想 beh 問 ê 時,伊 to̍h 過身去 ah!你敢知影啥意思?」我講,chit 句台灣俗語話是講,咸豐三年(1853)ê 古早代誌到 chit 陣猶 teh 講、猶 teh 餾。咸豐三年到底發生啥代誌 neh?
清國時代 ê 艋舺(今仔日 ê 萬華)開拓之初,主要是福建泉州 ê 晋江、惠安、南安三縣來 ê 移民,當時叫作「三邑人」、mā 叫作「頂郊人」。In 占有 ê 當然是 kah 唐山有船隻來往靠岸江邊、khah 好作生理、已經真鬧熱 ê 所在。Tòa 佇八甲庄(今仔日昆明街、貴陽街、桂林街老松國小附近)仝款是泉州府來 ê、卻是同安縣 ê 移民,俗稱「下郊人」。「下郊人」數想「頂郊人 ê 地盤,雙方起爭執。
當時 ê「艋舺街」有埤仔圍 tio̍h(今仔日 ê 康定路、內江街攏是水埤),當時來往 tio̍h 搭浮橋。頂郊人無論資源、人力攏占優勢,因為隔 tio̍h 埤仔無法度直攻下郊人,最後是立場中央 ê 安溪縣移民准頂郊人 kā in ê 祖師廟燒掉,頂郊人才有腳路攻入八甲庄刣人放火。
同安人干單會 tàng kā in 祠奉 ê 城隍爺 phāiⁿ teh 刣出一條血路,走到圭母卒社,而後 kah 原本 tòa 佇 hia ê 漳州人合立建設今仔日大稻埕 ê 基礎。In mā 合力起造佇今仔日迪化街 ê 城隍廟。佇艋舺 hit 間 hông 燒掉 ê 祖師廟,12年後三邑人才起還安溪人。
發生 tī 咸豐三年 ê chit 件械鬥當時叫作「頂下郊拚」。泉州 ê 同安人佳哉留 tio̍h 生命、mā 感謝原本 tòa 佇 hia ê 漳州人慷慨接納忽然間溢入來一大陣走路 ê「難民」,做伙建設日後 ê 大稻埕。
今年5月20,中國國民黨 beh 選黨主席,五六個候選人個個是武林高手,刀光劍影,刣 kah 流血流滴、甚至有 ê 刣 kah 見骨。報紙雜誌電視逐工都有新消息。有人罵講:中國國民黨內鬥上蓋 gâu。
其實咱看台灣歷史,tī 大清帝國統治台灣 ê 212年(1683~1895)期間,先有漢人移民 kah 原住民械鬥,漢人移民一下濟,閩南移民 kah 廣東移民械鬥,續落去福建移民中 ê 泉州人 kah 漳州人械鬥,台北 ê 泉州人 kah 泉州人械鬥。所以咱 m̄ -thang 笑中國國民黨 gâu 內鬥。
台灣俗語話有全島性 ê,mā 有地方性 ê。阮查某子 ê 契母,in 幾代人 tòa 佇今仔日 ê 延平北路二段,會使講是「正大稻埕人」,莫怪 in 老父會定定講 chit 句相當地方性 ê 台灣俗語話。台北以外 ê 台灣人可能真罕得聽 tio̍h chit 句台灣俗語話。阮查某子 ê 契母70外歲 ê「正大稻埕人」都 m̄ 知 chit 句台灣俗語話 ê 意思,比伊 khah 少年 ê 台北人真有可能自了 to̍h m̄ -bat 聽過。Chit 句台灣俗語話 beh 那有可能傳落去咧!

廣告/美好腳蹤368認購

我有話要說