雙颱相招來

Photo credit: x1klima via/ CC BY-ND

◎姚志龍

五十年來 頭一擺
尼莎海棠 相招來
一个出海 一个來
著愛準備 免受害

Gō͘-cha̍p nî lâi thâu chi̍t pái
Nî-sa Hái-tông sio-chio lâi
Chi̍t-ê chhut hái chi̍t-ê lâi
Tio̍h ài chún-pī bián siū-hāi

天頂已經 無雲彩
烏雲遮日 水拚來
尼莎雨來 淹肚臍
林仔邊 親像洋海

Thiⁿ-téng í-keng bô hûn-chhái
O͘-hûn jiā-ji̍t chúi piàⁿ–lâi
Nî-sa hō͘ lâi im tō͘-châi
Nâ-á-piⁿ chin-chhiūⁿ iûⁿ-hái

屏東地區 齊受災
公路積水 過輪胎
國軍出動 救災害
大家合作 得喝彩

Pîn-tong tē-khu chiâu siū chai
Kong-lō͘ chek-chúi kòe lûn-thai
Kok-kun chhut-tōng kiù chai-hāi
Tāi-ke ha̍p-chok tit hat-chhái

養殖塭仔 水滿台
魚蝦綴水 溜出來
頭家欲哭 無目屎
那有這款 悽慘代

Ióng-si̍t ùn-á chúi móa tâi
Hî-hê tòe chúi liu chhut–lâi
Thâu-ke beh khàu bô ba̍k-sái
Ná-ū chit-khoán chhi-chhám-tāi

風大雨大 攏真害
柚仔袂熟 盪盪幌
心肝綴硩 嗶噗筅
看天辛苦 啥人知

Hong-tōa hō͘-tōa lóng chin hāi
Iū-á beh se̍k tōng-tōng-hàiⁿ
Sim-koaⁿ tòe-teh phi̍h-pho̍k-chhái
Khòaⁿ thiⁿ sin-khó͘ siáⁿ-lâng chai

海棠已對 屏東來
賽洛瑪 記憶猶在
西南氣流 崁半台
極端氣候 著半猜

Hái-tông í tùi Pîn-tong lâi
Sài-lo̍k-má kì-e̍k iáu-chāi
Se-lâm khì-liû khàm pòaⁿ tâi
Ke̍k-toan khì-hāu tio̍h pòaⁿ-chhai

氣象數據 非常快
宣布歇睏 是大代
縣老爺著 費心裁
毋知下一刻 好bái

Khì-siōng sò͘-kì hui-siông khoài
Soan-pò͘ hioh-khùn sī tōa-tāi
Koān-ló-iâ tio̍h hùi-sim chhâi
M̄ chai ē-chi̍t-khek hó bái

天氣變化 無人知
永康仁德 濟所在
透早雨急 大水災
土石流 拚入厝內

Thiⁿ-khì piàn-hòa bô lâng chai
Éng-khong Jîn-tek chē só͘-chāi
Thàu-chá hō͘ kip tōa chúi-chai
Thô͘-sek-liû piàⁿ ji̍p chhù lāi

風調雨順 大期待
人照天理 是應該
平時水利 項項來
天會疼惜 免受害

Hong-tiâu ú-sūn tōa kî-thāi
Lâng chiàu thiⁿ-lí sī eng-kai
Pêng-sî chúi-lī hāng-hāng lâi
Thiⁿ ē thiàⁿ-sioh bián siū-hāi

廣告/聖經充滿我-經文填充本

我有話要說