◎洪南吉
1.搭上火車
父母互我火車票，
帶我上車有 sńg 笑，
猶閣細漢常吼叫，
父母教導得解竅。
2.增加新客
途中上車新旅客，
弟妹出世 thǹg 腹 theh，
得稱兄哥 ê 資格，
親族聚集過年節。
3.戀愛火車
戀愛若像坐火車，
交陪了解坐慢車，
性情袂合著轉車，
相親相愛高鐵車。
4.戀愛結婚
車內熟 sāi 媠小姐，
後來情書逐日寫，
結婚式場佇火車，
向望明年做阿爹。
5.建設家庭
M̄ 免媒人 ê 紹介，
男女交陪相意愛，
結婚鬥陣一生涯，
建設家庭真和諧。
6.紅嬰出世
某佇產房 teh 待產，
尪佇房外 teh 急等，
紅嬰出世來世間，
恭喜母子攏平安。
7.嬰兒階段
彌月油飯是特製，
七坐八爬到度晬，
玩具 iā 到一四界，
教子怎樣收好勢。
8.幼兒階段
幼兒階段愛嘻嘩，
查某囝仔愛娃娃，
查甫囝仔愛戶外，
快樂生活漸長大。
9.求學階段
求學階段真無奈，
升學父母高期待，
有人文史記持 bái，
有人數理袂理解。
10.就業階段
就業階段真勤勉，
認真敬業閣精研，
公司盈餘有明顯，
幫助公司大發展。
11.親友上車
親友上車成乘客，
鐵路便當濟人 beh，
好食食緊會拍 eh，
腹肚弓 ân 目睭嗑。
12.親友落車
絕症艱苦難承擔，
提早落車真 m̄ 甘，
無閣上車真遺憾，
靈魂相見天國站。
13.車過隧道
有時火車過隧道，
對暗到光無災禍，
人生遇暗求引導，
光明道路得建造。
14.車過鐵橋
河流上空有鐵路，
古早坐船慢橫渡，
建造鐵橋真辛苦，
人生享受謝先祖。
15.美好旅程
美好旅程 ê 乘客，
互助合作好品格，
相親相愛補欠缺，
老伴互助 ná 松柏。
16.退休階段
退休 m̄ 免去上班，
增加真多閒時間，
老友交誼常聚餐，
老伴散步手相牽。
17.父母落車
兒童時期幻想 gām，
想做會帶到終站，
父母先落心 m̄ 甘，
放我車內真難堪。
18.無久輪到
M̄ 知佇時輪到我，
落車時間愈近倚，
美好回憶寫佇紙，
多人愛看車廂滿。
19.時到落車
落車行李攏無 kōaⁿ，
m̄ 是疏忽抑貧 tōaⁿ，
m̄ 是無力、驚流汗，
天堂用品全部換。
