懷念敬疼 ê 邱善雄牧師

◎Lîm Chùn-io̍k

時間過了真緊,敬疼 ê 邱善雄牧師蒙主恩召已經 beh 一週年。Chit-má 我 iáu 感覺非常 m̄ 甘!邱善雄牧師是我 ê 客語老師,mā 是我 ê 信仰導師 kah 好朋友。

回憶起來,2005年我受聘去中山醫學大學台語系教「台語電腦」課,邱牧師 to̍h tī hia teh 教「客語」,我把握 chit-ê 好機會 tùi 伊學習客語。伊 ê 客語課是早起時8點開始,伊 lóng 前一暗去 tòa 彰化基督教病院 ê 來賓宿舍。因為伊是 tùi 彰基 ê 院牧退休,所以伊 mā 替我安排前一暝去 tòa 彰基 ê 來賓宿舍,隔工早起 to̍h 做伙坐火車 ê 區間車去 tī 台中市大慶路 ê 中山醫學大學上課。

邱牧師是 hō͘-ló 人,tùi 客語白話字開發者方廣生牧師學習客語羅馬字,就 án-ne 成做台灣 siōng 優秀 ê 客語老師。伊為台灣基督長老教會總會編著《台灣客家話基本教材》來利益客語教學,我有 kā 伊改編做影音片,掛 tī 客語信望愛網站(http://hakka.fhl.net),方便大家上網使用。我 mā 有 kā 邱牧師 tī 中山醫學大學 ê 客語教學實況錄影製片,mā 是掛 tī 客語信望愛網站。Chit-má kā 伊開來看,有無限 ê 懷念 kah 感念邱牧師 ê 用心教學。

邱牧師支持 koh 幫助我架設客語信望愛網站,hit 時伊 ê 目睭漸漸變 bái,m̄-koh 伊有推薦中山醫大台語系第一屆 ê 幾位優等生來協助,其中 siōng 優秀 ê 劉敏貞小姐 tī 伊 ê 教導之下,後來就洗禮成做基督徒。

為 tio̍h beh 充實客語信望愛網站 ê 內容,邱牧師安排劉小姐 kah 我去拜訪李喬大師,請伊同意阮 kā 伊 ê 大作──《寒夜》、《荒村》、《孤燈》翻寫做「漢羅版」來上網,伊 ê 用心 hō͘ 阮永遠 bē bē 記得。
根據我所知:邱牧師1936年11月21日生,1969年7月台南神學院畢業 to̍h 受差派做傳道師,1972年10月封牧。牧過太麻里、六龜、竹田、萬巒、公館(竹中)、銅鑼,擔任過彰化基督教病院院牧、新竹中會議長、台灣基督長老教會總會客家宣教中心主任、台灣《客語聖經—現代台灣客語譯本》翻譯小組委員、台灣神學院 kah 中山醫學大學台語系 ê 客語老師、台灣羅馬字協會理事等等。

全民台語聖經協會開始招「共同發起人」ê 時,邱牧師一聲 to̍h 答應,每 pái 開會 lóng 有來參加,tī 成立大會 ê 時 mā 受選做理事,kah 大家做伙 phah 拚推廣《全民台語聖經》。阮有一個共同 ê 夢:ǹg 望有一工 ē-tàng 出版《全民客語聖經》,真可惜 tī 伊有生之年無法度實現。

2015年11月全民台語聖經《新舊約全書》出版了後,我去探訪 tòa tī 馬偕病院竹圍分院附近 ê 邱牧師,順續送伊一本《新舊約全書》漢羅版,伊收 tio̍h hit 本聖經非常歡喜。Hit 時伊 ê 身體非常 bái,m̄-koh 我講 beh 去探訪 hit 時 tòa tī 馬偕竹圍分院養護病房 ê 駱維仁博士,伊 mā 帶病 kah 我做伙去。「病人」探訪「病人」ê 情景,hō͘ 我深深感受 tio̍h tī 上帝 ê 面前,人雖然軟弱 iáu 會互相關心,互相疼惜,我深深受感動。

邱牧師,我感謝你對我 ê 疼惜 kah 信仰 ê 教導,願你 soah 你 tī 世間美好 ê 工,ē-tàng 放心 tńg 去你 ê 祖家,安息主懷!

我有話要說