到老也無歪斜

東後寮教會舊禮拜堂

◎柯三益

1917年8月29日嘉義中會牛挑灣教會佇義竹鄉東光村,台19號公路邊,正式成立東後寮教會,這是牛挑灣教會最後一間分設 ê 教會。1919年中會正式差派傳道師駐堂牧會,後來因為信徒人數增長,禮拜堂容納 bōe-lo̍h,佇1926年日本昭和初年8月落成一間紅磚及木材結構,chhù-téng khàm 台灣 chhù-hiā ê 禮拜堂,後來阮攏稱做舊禮拜堂。

Chit-ê 禮拜堂有歐洲早期小型禮拜堂 ê 款式,佇2002年列入中華民國文建會歷史建築百年專輯內面,也被列做三級古蹟。一直到1965年期間,信徒人數快速增長,聽家父(柯清給長老)回憶,佇伊細漢 ê 時參加主日學,一直到伊去當兵以前,主日學一直維持有接近150名 ê 學生。因為信徒增長,舊禮拜堂也已經容納 bōe-lo̍h,因此佇1965年5月又閣落成一間新 ê 禮拜堂,一直到現在。

東後寮教會新禮拜堂

東後寮教會是由東後寮、上溪洲、下溪洲、以及新庄,四庄頭 ê 信徒所組成,我 ê 阿公(柯精長老)、伯公(柯萬料長老),細漢 ê 時佇牛挑灣教會讀主日學領受福音,後來伯公佇東後寮教會成立 ê 時就擔任執事,前後伯公及阿公擔任教會長執 ê 時間攏超過40年以上,阮家族也一直佇東後寮教會聚會。真 tú-hó,我是1965年5月出世佇下溪洲,佇老母 pak-tó͘ 內 ê 時就 tè 伊參與新禮拜堂建堂做小工 ê 工作,舊禮拜堂是1965年代以後主日學學生共同 ê 回憶,因為新禮拜堂落成以後,舊禮拜堂就成做主日學學生合班 ê 教室,四庄頭 ê 囝仔聚集 tī-chia 聽聖經故事、背金句、唱詩歌、做遊戲、看表演、領獎品、四庄頭報佳音等等,特別是夏季學校更加互人期待,有真濟哥哥姊姊 chhōa 阮做真濟趣味 ê 活動。

東後寮教會一直真重視主日學 ê 教育,特別是母語教育,佇國民黨政府禁止羅馬字聖經詩 ê 時代,亦是我讀主日學 ê 年代,東後寮教會猶原一直堅持母語 ê 主日學教學。白話字課程是主日學學生必修 ê 課程,對細漢囝仔到大漢囝仔有安排系統性 ê 教學,對字母、ho͘-im、字句、短文,一直到聖詩班、聖經班,佇母語學習中間建立兒童本土信仰 ê 根基。

也因為按呢,自設教以來,東後寮教會有栽培真濟傳道人,親像台灣基督長老教會總會第一任議長黃武東牧師等。感謝主,互我有福氣佇細漢 ê 時,通領受 chiah-nih hó ê 信仰裝備,che sī 我上感念母會的所在。雖然佇國中二年級暑假就離開故鄉,到今已經有將近接近40年久 ê 時間,總是東後寮教會對我 ê 教育及栽培,所帶來 ê 影響,比一般學校 ê 教育閣卡深刻,就親像聖經箴言22章6節所講的:「教養囝仔,著用合宜 ê 法,就伊到老也無歪斜(oai-chhoa̍h)。」

雖然後來教會因為人口外移加上老化,聚會人數漸漸減少,但是信徒屬靈 ê 生命卻是愈來愈豐盛,所有離開故鄉到外地 ê 信徒,對著母會東後寮教會一直有真強 ê 向心力,常常為母會關心、代禱及奉獻。現任吳斯凱牧師牧養教會,教會不但關顧會內信徒,也與出外僑胞建立真好 ê 互動,互阮所有出外 ê 信徒攏感受到母會真正是將阮當作東後寮教會 ê 囝仔。

佇教會100週年 ê 前一年,就是2016年2月6日,美濃大地動 ê 時,東後寮教會新禮拜堂(已經使用50年),以及牧師館遭受真大損害,已經達到總會補助 ê 標準,受到教會各界關心及奉獻,出外以及在籍信徒也出錢出力,教會佇真緊 ê 時間(同年2月27完工)就重建完成,互阮感受除了上帝 ê 帶領,也深深感受東後寮教會猶原是真有行動力、有活力 ê 教會。今母會東後寮教會歡慶設教100週年,身為東後寮教會 ê 囝仔,真正是滿心感謝上帝,佇參加慶典前兩日也感動寫了幾句話,下佇母會FB ê 社團頂面,及眾兄弟姊妹同齊慶祝阮 ê 教會百歲生日,siâng-sî 也寫 chit 篇文章來做紀念。

 

慶祝設教百週年

賀詞傳達眾心意

東光村內設教會

後代通得主恩典

寮堂古典閣莊嚴

教勢興旺福音傳

會友純樸堅固信

百年傳承救世人

歲數加添愈勇建

生湠濟濟上帝子

日日進步得主疼

 

我有話要說