認罪

◎Pháiⁿ-gín-á Oan-lí-siā

你閣無欲承認?我已經看出出
Úi 窗縫來 ê 冷風硬拖你落床
毋願放棄 ê 雙手佮鬧鐘仔搝大索
佇認輸進前,你總是失去性地
然後事後無承認粗殘 ê 暴力行為

緊起來啦!
纓纏 ê 棉被輕聲細說安慰
驚嚇走閣咧追夢 ê 你
若是傷早醒
是毋是會袂記家己 ê 誓言

沓沓仔失去相戀 ê 體溫
佇烏暗分袂清東南西北
誰欲幫贊你掖一寡日頭光
引 chhōa 路途
佇你宣告投降進前

夢–裡
起床洗蕩
你斟酌看
鏡內 ê 你敢閣有走散 ê 靈
抑者是鬥毋著所在
你斟酌修剃喙鬚
直欲袂記得家己 ê 歲數
親像墮落時空旅行

鬧鐘仔閣一擺企圖攪擾你
佇你結束伊生命進前
予伊好好仔大聲訴苦
代替你無欲承認 ê 軟弱

你講,閣無欲承認?
我已經看出出

我有話要說