人生難過 ê 四關

◎洪南吉

緒言

人生四關真難過,
英雄、美人受欽佩,
金錢、死亡永衰退,
欲過四關無好做。

一、英雄難過美人關

「食色性也」孔子講,
二種享受攏真爽,
若是亂食胃反抗,
英雄亂性名失喪。

英雄難過是美人,
食色天性有所憑,
美人誘惑戀心暈,
中計誤國失忠臣。

特務精密 ê 計畫(e̍k),
美人妙計 ê 誘惑,
英雄中計輸對敵,
濫用性色成悲劇。

二、美人難過金錢關

「苦工」靠力真可憐,
美人靠媠趁金銀,
「金錢」美人 ê 誘因,
穿用名牌常換新。

美人引誘嫁富翁,
享受生活常盛裝,
美人虛榮 ê 激動,
難過虛花 ê 奢望。

美國總統新出爐,
富商「川普」娶名模,
名模美人嫁川普,
名利雙收總統某。

三、金錢難過死亡關

富甲天下秦始皇,
「老、病」濟錢難設防,
無「不死丹」終死亡,
改掌地下 ê 帝王。

死期臨到難阻擋,
親人死別心哀痛,
生命有限身埋葬,
多錢無效落墓壙。

金錢難買寸光陰,
金錢難阻死入侵,
人生有限死來臨,
送葬哀歌同齊吟。

子兒生子有成功,
絕症死亡「見祖公」,
有人長壽做阿祖,
好額也是著歸土。

四、死亡難過審判關

上帝精心創造人,
人佮動物是無仝,
有歕活氣入鼻孔,
人有靈魂動物空。

人類死後有審判,
所作善惡有界線,
上帝靈魂審判官,
判定歸宿定名單。
結語
英雄、美人難過關,
金錢、死亡無從寬,
關關難過有連串,
這是人生免埋怨。

我有話要說