路竹教會2017年聖誕節感恩禮拜(啟應文)

◎蘇晏德

啟:十二月份過聖誕,聖誕鐘聲當咧霆
Khé:Cha̍p-jī goe̍h-hūn kòe Sèng-tàn,
Sèng-tàn cheng-siaⁿ tng teh tân

應:耶穌降生拯救咱,賜咱福氣佮平安
Èng:Iâ-so͘ tàn-seng chín-kiù lán,
Sù lán hok-khì kah pêng-an

啟:二十四暗平安暝,等待耶穌來出世
Khé:Jī-cha̍p-sì àm pêng-an-mî,
Tán-thāi Iâ-so͘ lâi chhut-sì

應:生佇馬槽真卑微,博士揣人靠天星
Èng:Seⁿ tī bé-chô chin pi-bî,
Phok-sū chhōe-lâng khò thiⁿ-chhiⁿ

啟:曠野周圍真恬靜,天星閃熠現光明
Khé:Khòng-iá chiu-ûi chin tiām-chēng,
Thiⁿ-chhiⁿ siám-sih hiàn kng-bêng

應:獨生聖囝佇天頂,為救萬民來降生
Èng:To̍k-seⁿ Sèng Kiáⁿ tī thiⁿ-téng,
Ūi kiù bān-bîn lâi kàng-seng

啟:上帝恩典佮疼痛,救贖萬民用苦工
Khé:Siōng-tè un-tián kah thiàⁿ-thàng,
Kiù-sio̍k bān-bîn ēng khó͘-kang

應:耶穌降臨拯救人,普天同慶對天降
Èng:Iâ-so͘ kàng-lîm chín-kiù lâng,
Phó͘-thian tông-khèng tùi thiⁿ kàng

啟:二十四暗報佳音,人人祈禱備辦心
Khé:Jī-cha̍p-sì àm pò ka-im,
Lâng-lâng kî-tó pī-pān sim

應:信徒彈瑟閣彈琴,迎接救主來降臨
Èng:Sìn-tô͘ tôaⁿ-sek koh tôaⁿ-khîm,
Ngiâ-chih Kiù-chú lâi kàng-lîm

啟:12月二五聖誕節,救主耶穌來降世
Khé:12 goe̍h jī-gō͘ Sèng-tàn-cheh,
Kiù-chú Iâ-so͘ lâi kàng-sè

應:伯利恆城真美麗,歡喜歌聲滿四界
Èng:Pek-lī-hêng-siâⁿ chin bí-lē,
Hoaⁿ-hí koa-siaⁿ móa-sì-kè

啟:獨生聖囝主耶穌,為著人類來受苦
Khé:To̍k-seⁿ Sèng Kiáⁿ Chú Iâ-so͘,
Ūi-tio̍h jîn-lūi lâi siū-khó͘

應:阮欲大聲來歡呼,感謝救主引 chhōa 路
Èng:Goán beh tōa-siaⁿ lâi hoan-ho͘,
Kám-siā Kiù Chú ín-chhōa lō͘

啟:耶穌出世馬槽內,聖誕歌聲報人知
Khé:Iâ-so͘ chhut-sì bé-chô lāi,
Sèng-tàn koa-siaⁿ pò lâng chai

應:毋管古今佮未來,耶穌佮咱永同在
Èng:M̄ -koán kó͘-kim kah bī-lâi,
Iâ-so͘ kah lán éng tông-chāi

我有話要說