秋遊彼一日

◎陳金順

往過參加幾落擺高雄農業局辦 ê「一日農夫」,印象不止仔袂䆀。這回誠無簡單 siâⁿ 知己頕頭同意,代先報名11月初5「內門蔗園總鋪師饗宴」,落尾,順伊 ê 意改行程參加11月初4「生命之泉雙享泡」。佳哉,承辦活動 ê 農識公司足有站節氣,干焦叫阮補差額,無扣30% ê 賠償金。

秋風微微,早時淡薄仔涼冷。熟似兩年外,頭擺騎16冬 ê 銅管仔車載伊。佇約束 ê 7點20分進前,總算揣著 in 兜就近彼間7-11。伊徛家佇德善路,這个名有合我 ê 意。看著伊掛喙罨寬寬仔行來,緊猛提出古錐 ê Hello Kitty安全帽仔予伊戴。

過仁德交流道,直透行這條車沓沓交易 ê 大通路。拄才騎過來 ê 時,路裡猶無啥車,我愛準節予好勢,才袂延著8點 ê 火車幫。天公伯有保庇,到甲後站停車,猶有十 thóng 分。拆兩張莒光號車單,內中一張3車29號,哪會遮拄好?頭擺買著生日票,問伊今暗買彩券敢好?伊頕頭同意。

新左營站落車,趕到彩虹市集,欲倚9點,無耽誤眾人出發 ê 時間。Peh 起遊覽車,阮坐踮正爿尾後算來第二排。準時起行,導遊紹介行程、講笑詼、拍 lā 涼,落里港交流道了後,無一時仔隨到高雄農場,量約半點外鐘。這个佇美濃 ê 農場有8.4公頃,環境清幽清幽,一踏入園區,隨感受青 ling-ling ê 綠意。人講誠意食水甜,阮這團一到位,農場主要幹部出來迎接,順紲為逐家紹介園區 ê 特色。

紲落,頭一个節目是上蓋刺激 ê「漆彈射擊」。毋通想傷濟,心頭掠定免驚惶,遮無像電視裡互相彈咧身軀頂彼款 chhut 頭。五个靶位各徛一个人,手攑輕 báng-báng ê 銃,相準20公尺遠 ê 靶心彈20粒銃子,姿勢、年歲、查埔查某無論,看啥紅心彈了上齊勻。伊無做過兵殘殘彈50外分,我佮30冬前仝款頇顢,總仔共仔才40幾。

武齣耍煞奕文場,圓桌仔頂面鋪排一丸一丸粿粞,純白、粉紅囥做伙,紅豆饀嘛踮邊仔鬥鬧熱。阮捻一塊粉紅色粿粞,紅龜包豆餡,手勻聊仔挲,挲圓捏扁了後,共半成品囥踮粿模頂,連鞭現出媠媠 ê 桃仔形。
Lò sia̍k-sia̍k、腔口特殊 ê 場長,親身潦落來為眾人紹介園區 ê 樹木花草,毋管紅艷抑青翠,佇遮生長總是有 in ê 都合佮條件,親像一欉全台灣罕有、對他鄉外里徙栽 ê 樹仔,會使講是無價之寶。

中晝,佇農場餐廳食好料 ê。這搭料理 ê 特色聽講是滇緬口味,本山人食菜人無緣享受異國風味,自然就好。事實上,對喙齒疼 ê 人來講,山珍海味較輸豆腐白汫無味。

下晡,實地體驗農民生活。代先,行一段田岸仔路來到咖啡園。我想,逐家檢采參我相 siāng,啉過咖啡、看過咖啡豆,毋捌親目睭見證咖啡樹 ê 生張。我用手機仔翕落咖啡樹 ê 形影,遵照指示,親手挽熟紅 ê 咖啡果,咖啡果 tam 起來微微仔甜,外表足成細粒柑仔蜜,紅朱朱有喜氣。

煞尾,徙跤來野蓮池。我自細漢驚水,毋敢換穿田蛤仔衫,無法度落去池裡挽浮佇水面 ê 野蓮,干焦徛踮水池仔邊,看彼六位男女勇士耍甲喙笑目笑。回程 ê 時,佇車頂一人分兩 lok 包裝好 ê 野蓮,我全然送予朋友紮轉去佮阿姆分享,我無鼎無灶雙手兩枇弓蕉上利便。

我知影,伊對這擺行程無蓋滿意。其實,號名「一日農夫」體驗活動,若會當予各地來 ê 遊客加流寡汗、做寡田穡,絕對會閣較中眾人意。

佇新左營坐自強快車,轉來台南才五點半較加。伊無喝枵、我喙齒疼,順勢載伊轉到徛家巷仔口。無論如何,佇拜六時仔,會當招伊出來大自然行踏,有影心清氣爽,歡喜無地講。

轉到厝,喙齒疼甲無力來吳園聽朋友唱〈安平平安〉。多謝耀乾兄嫂報我揣著就近 ê 聖恩齒科,佳哉拜六暗有咧看診。經過醫生猛掠清洗、治療我 ê 喙齒,紲落來藥局拆藥仔。啉一 au 麥片了後,tháu 一包藥仔吞落,有影規暝好落眠。

我有話要說