我 ê 阿公 對按呢來信主

◎翁博文

1.
我是信主第三代 承先啟後說由來
二代老父享高齡 滿滿脂油滴路徑
頭代阿公名翁立 性地硬氣閣固執
阿公徛佇小田庄 岸內農場南新庄
作穡只有幾分地 子女總共有九個
小小庄頭無幾戶 合理著要相照顧
若是阿公有差異 目睭心靈攏破病
厝邊信主他看輕 毋肯佮 in 相親近
恥笑詈罵閣咒詛 信主家庭他厭惡

2.
年冬至祭拜慣例 無嗣廟祭拜牲禮
廟庭牲禮排好勢 阿公燒金鞠躬禮
欲互神明食卡濟 他就田尾四界踅
踅完回到祭拜遐 牲禮擒甲攏狗蟻
阿公發怒大受氣 腳手撞碗閣撞筷
原來所拜是狗蟻 毋是神明有來食
所有祭拜的物件 一盡飼豬攏無食
信仰因此起懷疑 阿公從此大覺醒
即時轉變他家己 宗教轉念就開始

3.
起先感覺真歹勢 對待厝邊足好禮
厝邊頭尾相揣坐 信主家庭相談話
開嘴表明有意思 欲佮厝邊同信主
厝邊掠做是滾笑 料錯阿公是毋對
毋肯導他去教會 阿公只好家己揣
鹽水月津橋東旁 教會十架記號明
阿公揣到拜堂來 決心信主做禮拜
聖神開始大做工 阿公擒主攏無放
信主對此頭一代 上帝恩典一直來
阿公信主發熱心 救恩延續到如今
明載來由示其嗣 敬奉上主萬代久

我有話要說