有機小農

◎姚志龍

感謝小農 無算本
自然生產 上界穩
收成雖然 有較損
心存喜樂 一切順

用心經營 得好報
無毒生產 對人好
這件工課 無輕可
咱的故鄉 著疼惜

有機菜蔬 歹照顧
無噴農藥 真辛苦
恁的身體 阮保護
流汗做穡 無喝苦

萬物結實 攏有期
順天順地 照四季
只要日光 佮水氣
天地逐項 攏得利

人類蟲豸 做伙蹛
互相效力 莫牽拖
授粉採蜜 就靠我
植物動物 攏得活

菜蔬對頭 食到尾
果實對內 食到皮
你這碼 硩講啥貨
是講有機 的耕犁

有機買賣 真趣味
大家無嫌 足歡喜
型體雖然 無齊一
清氣生食 有原味

Kám-siā sió-lông bô sǹg pún
Chū-jiân sing-sán siōng-kài ún
Siu-sîng sui-jiân ū khah sún
Sim chûn hí-lo̍k it-chhè sūn

Iōng-sim keng-êng tit hó-pò
Bô-to̍k seng-sán tùi lâng hó
Chit-kiāⁿ khang-khòe bô khin-khó
Lán ê kò͘-hiong tio̍h thiàⁿ-sioh

Iú-ki chhài-se pháiⁿ chiàu-kò͘
Bô phùn lông-io̍h chin sin-khó͘
Lín ê sin-thé gún pó-hō͘
Lâu kōaⁿ chò-sit bô hoah khó͘

Bān-mi̍h kiat-si̍t lóng iú-kî
Sūn-thian sūn-tē chiàu sù-kùi
Chí-iàu ji̍t-kng kap chúi-khì
Thiⁿ-tē ta̍k-hāng lóng tit-lī

Jîn-lūi thâng-thōa chò-hóe tòa
Hō͘-siōng hāu-li̍k mài khan-thoa
Siū-hún chhái-bi̍t chiū khò-góa
Si̍t-bu̍t tōng-bu̍t lóng tit-oa̍h

Chhài-se tùi thâu chia̍h kàu bóe
Kó-si̍t tùi lāi chia̍h kàu phôe
Lí chit-má teh kóng siáⁿ-hòe
Sī kóng iú-ki ê king-lê

Iú-ki bé-bē chin chhù-bī
Tāi-ke bô-hiâm chiok hoaⁿ-hí
Hîng-thé sui-jiân bô chê-it
Chheng-khì chheⁿ chia̍h ū goân-bī

我有話要說