主疼的大目降教會

◎胡仁祿

1
古早府城的東邊,一莊頭叫大目降;

Kó͘ -chá Hú-siâⁿ ê tang-pêng, chi̍t chng-thâu kiò Tōa-ba̍k-kàng;

莊邊就有虎頭埤,埤內景緻真美麗;

Chng-pêng chiū-ū Hó͘-thâu-pi, pi-lāi kéng-tì chin bí-lē;

試驗所牛隻多多,樹木青翠遍地花;

Chhì-giām-só͘ gû chiah chōe-chōe, chhiū-ba̍k chheⁿ-chhùi phiàn-tōe hoe;

水果蔬菜真正多,可比親像迦南地;

Chúi-kó so͘-chhài chin-chiàⁿ chōe, khó-pí chhin-chhiūⁿ Ka-lâm-tōe;

佇遮設立主聖會,信徒禮拜來做伙;

Tī-chia siat-li̍p Chú sèng-hōe, sìn-tô͘ lé-pài lâi chò-hóe;

佇主疼裡若一家,相疼相助無欠缺;

Tī Chú thiàⁿ lí nā chit-ke, saⁿ thiàⁿ siong-chō͘ bô khiàm-khoeh;

信徒熱心常聚會,上帝恩典也加倍;

Sìn-tô͘ jia̍t-sim siông chū-hōe, Siōng-tè un-tián iā ka-pōe;

時間一日一日過,今也已經上百歲。

Sî-kan chi̍t-ji̍t-chi̍t-ji̍t kòe, taⁿ iā í-keng chiūⁿ pah hòe.

2

想起信仰的前輩,開拓教會買土地;

Siūⁿ-khí sìn-gióng ê chiân-pòe, khai-thok kàu-hōe bé thó͘-tē;

無嫌勞苦流汗血,為主盡忠拚命做;

Bô-hiâm lô-khó͘ lâu kōaⁿ-hiat, ûi Chú chīn-tiong piàⁿ-miā chòe;

學主款式背十架,服事無論大與小;

O̍ h Chú khóan-sek pòe Si̍p-kè, ho̍k-sāi bô-lūn tōa kap sòe;

東西南北來走找,找著迷羊緊轉回;

Tang-sai-lâm-pak lâi cháu-chhē, chhē-tio̍h bê-iûⁿ kín chóan-hôe;

今咱大家想詳細,趁天還光工緊做;

Taⁿ lán tāi-ke siúⁿ sióng-sè, thàn thiⁿ iáu-kng kang kín chòe;

躊躇聽侯時若過,日暗無做真後悔;

Tiû-tû téng-hāu sî nā kòe, ji̍t àm bô chòe chin hō͘-hóe;

牧者信徒做一伙,與主同工常交陪;

Bo̍k-chiá sìn-tô͘ choh chi̍t-hóe, kap Chú tâng-kang siông kau-pôe;

有好見證好行做,教會新化的教會。

Ū hó-kiàn-chèng hó-kiâⁿ-chòe, kàu-hōe Sin-hòa ê Kàu-hōe.

廣告/聖經充滿我-經文填充本

我有話要說