Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: Khu Phek-hôa
Kin-nî gō͘ goe̍h hūn Bú-hàn hì-iām khai-sí tī siā-khu sio-òe thòaⁿ-khui, lâng-lâng chiah chai ài iàu-kín ī-hông-siā ê tāi-chì. Bāng-ā-bāng, tán-ā-tán, chiong-kî-bóe lûn tio̍h góa ah, chit the lóng sī chù AZ, lán chiàu Tân Sî-tiong pō͘-tiúⁿ ê kiàn-gī, lûn–tio̍h tō khì chù, bián koán sī siáⁿ khóaⁿ pâi-chú.
Hit-ji̍t ē-po͘ siàng tōa-hō͘, iang lāu-ang–ê sái-chhia chài góa khì Ko-hiông tián-lám-koán, 4 tiám thóng kàu-ūi, kiâⁿ bô saⁿ pō͘ tō kàu chù-siā-tiûⁿ. Ín-chhōa jîn-oân lóng chin chhin-chhiat, keng-kòe hō͘-lí-su kap i-seng chu-sûn khak-tēng sin-thé chōng-hóng, chin kín tō chú hó ah. Chi̍t chù–lo̍h, sûi kám-kak péng-pak péng-pak koh tài thâu-gông, iáu leh tiû-tû kám beh ho͘-kiò i-hō͘ jîn-oân, sûi khòaⁿ tio̍h thâu-chêng keh 3 chiah í-á ê só͘-chāi ûi chi̍t tīn lâng, hn̄g-hn̄g khòaⁿ bē chheng-chhó, chhin-chhiūⁿ sī ū lâng sin-thé koh-iūⁿ, góa hòⁿ-hiân it-ti̍t leh chim-chiok, tán chhù-lí hó-sè, góa hoan-thâu chù-ì ka-kī ê chōng-hóng, tú-chiah ê chèng-thâu lóng siau-sit khì ah, kám-sī ka-kī kòe-thâu kín-tiuⁿ?
Beh tńg–khì ê sî iáu teh lo̍h-hō͘, khòaⁿ pió-á chiah gō͘ tiám thóng, pak-tó͘ ná-ē chiah iau? Kún-sǹg-chhiò kóng che it-tēng sī AZ ê hù-chok-iōng, soah khì hō͘ lāu-ang–ê chhiò kóng sī iau-sâi. Bóe-chhiú koh chin-chiáⁿ khòaⁿ tio̍h bīn-chheh ū i-seng siá kóng i chù AZ í-āu kám-kak chin iau-cho, ē-bīn chi̍t-tōa-kōaⁿ lâng hôe-èng kóng in mā sī sio-siāng, goân-lâi hù-chok-iōng iā ū am-khàm-pán ê.
Hit mê bē chēng 8 tiám, lâng tō thiám-thiám siān-siān, tòng-chò ka-kī lán-kin sô chhut–lâi leh chhōe nôa-thâu, bô pān-phoe chit-sî sī “side effect” tiām-tiām leh chiap-kīn. Chá-chá hioh-khùn, pòaⁿ-mê khí–lâi kúi-lo̍h-pái lim kún-chúi, kiam cháu piān-só͘, kah-phōe hiâm joa̍h bô-kah khí ùi-kôaⁿ, kin-pún khùn bē-khì. Keh-kang cheng-sîn, kui sian lâng siān-tauh-tauh nńg-kauh-kauh, thâu-khak gông-chhia-chhia, bêng-hián ê hù-chok-iōng lâi ah. Kín khì the tī bîn-chhn̂g téng, siáng chai iáu-sī khùn bē lo̍h-bîn, thâu chi̍t-chūn chi̍t-chūn tiuh-thiàⁿ, thé-un lú giâ lú koân, kian-sim bô beh chia̍h thè-sio-io̍h-á, koat-tēng iōng thó͘-pō͘ lâi thè-sio. The̍h peng ê pò͘ khǹg thâu-hia̍h kàng un-tō͘, ē-po͘ kái ōaⁿ khì e̍k-kng chìm un-chúi koh ná iōng e̍k-kin chhit seng-khu thang kín thè-sio. Kóng chi̍t ê chhiò-khoe pun lín thiaⁿ, seng-khu chhit ta chiah hoat-hiān bô châi-tiāu ka-kī chhēng lāi-saⁿ, in-ūi chhiú-kó͘-thâu sng-thiàⁿ, gia̍h bē koân koh bô khùi-la̍t, chí-hó hoah-hiu cha-bó͘-kiáⁿ lâi tàu-saⁿ-kāng, bô-gî-gō͘ pē-á-kiáⁿ saⁿ lâng iáⁿ-phìⁿ khòaⁿ kah tng jia̍t, kin-pún thiaⁿ bē tio̍h góa ū khùi bô la̍t ê niau-á kiò siaⁿ, khòaⁿ-phòa kā gōa-saⁿ long leh, khì kheh-thiaⁿ hoah kiù-lâng chiah kái-koat. Keng-kòe chia ê thó͘-pō͘, lâng chiah ū tām-po̍h-á cheng-sîn, m̄-koh bô ūi-kháu, chhin-chhiūⁿ beh péng-pak, chin bô sóng-khoài. Àm-thâu-á hiông-hiông chi̍t-chūn àu-eh, kín chông khì piān-só͘, kā pak-lāi ê mi̍h chóng thò͘ chhut–lâi ah, thò͘ soah, lâng ke chiok khùiⁿ-oa̍h.
Tē 3 kang lâng tō khah chheng-sóng, sui-bóng kâng-khóan chia̍h bē-lo̍h, chhiú-kó͘-thâu sng-thiàⁿ, m̄-koh thé-un chèng-siông, thâu mā khah bē thiàⁿ ah, ē-thang bián the tī bîn-chhn̂g, bô óng-hùi cha-hng thò͘-sái neh. Tē 4 kang chhiú-kó͘-thâu sió-khóa sng-thiàⁿ, chhun–ê lóng hó-lī-lī ah, ū-kàu hōaⁿ-hí.
Chit kúi kang ka-kī chhiò kóng sī hō͘ AZ jīn-chèng ê siàu-liân-lâng, sū-si̍t sī cha-pō͘-lâng hù-chok-iōng khah khin-bî, sin-bûn pò-tō chá to̍h ū kóng ah. Khòaⁿ gún lāu-ang–ê tō chai, i tō bô sáⁿ chùn-būn-tio̍h, góa soah kan-khó͘ kah, ǹg-bāng chù tē-jī che ē khah hó-sè.
Kî-sit góa chiok bô-táⁿ, ta̍k-khoán ī-hông-siā ē-tàng siám–ê choa̍t-tùi bē khì chù, chhiūⁿ ta̍k-nî ê liû-hêng-sèng kám-mō͘ mā bô khì chù, chóng sī kiaⁿ hit ê hoat-seng ki-lu̍t chin kē ê hù-chok-iōng. Siàu-siūⁿ lī-iōng kûn-chiòng chù-siā ê phó͘-phiàn-sèng lâi pó-hō͘ ka-kī, m̄-koh Bú-hàn-hì-iām sit-chāi thài kiaⁿ lâng, góa m̄-káⁿ koh siàu-siūⁿ pa̍t-lâng chù ī-hông-siā ê pó-hō͘-le̍k, ka-kī mā tio̍h hù-chhut.
