Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 陳俐雯
Tiōng-lâm khin-lú, thiⁿ-sî tiāⁿ
重男輕女，天時定
Lâm-jîn hù-kùi, lú chiān-miā
男人富貴，女賤命
Ta-po͘ lo̍h-thô͘, chhit-pó kiáⁿ
查埔落土，七寶囝
Châ-bó͘ chhut-sì, bóng-chhī miā
查某出世，罔飼命
Khioh-gín-á, sî lâi tiāⁿ
抾囡仔，時來定
Sim-chêng kún-ká, tam-su-iâⁿ
心情滾絞，擔輸贏
Thiam-teng tōa hí, ke-chiú iû-pn̄g chhiáⁿ
添丁大喜，雞酒油飯請
Thiam-kháu liáu-chîⁿ, ut-chut kòng-phòa tiáⁿ
添口了錢，鬱卒摃破鼎
Tī lâm-sèng tek-sè ê sè-kài
佇男性得勢的世界
Châ-bó͘-lâng sī ū hûn bô iáⁿ ê chhài-chí-á miā
查某人是有魂無影的菜籽仔命
Bóng-chhī ê ke̍k-to̍k, nî-kāng-goe̍h lo̍k-ìn
罔飼的劇毒，年共月烙印
Chia seng-seng sè-sè siū-to̍k ê lêng-hûn
遮生生世世受毒的靈魂
Chiâⁿ-chò chhian-chhian bān-bān ê kòe-chú-siú
誠做千千萬萬个劊子手
Lûn-hôe bô chi̍t-sî thêng-kha, bô-liáu-sî
輪迴無一時停跤，無了時
Phú-á-kng chhiō kòe “Pa̍k-lú” ê kheng-khak
殕仔光炤過「縛女」的框殼
Pa̍k-sin ê ba̍k-kîⁿ, ba̍k-sái tih
縛身的目墘，目屎滴
Bùn-chhut chi̍t-kháu koh chi̍t-kháu m̄-goān ê oàn-khùi
濆出一口閣一口毋願的怨氣
Khan-khioh chhut hoán-choán bóng-chhī ê la̍t-thâu
牽抾出反轉罔飼的力頭
Sit-kó͘ tháu-pàng, tián-khui hi-bāng
翼股敨放，展開希望
Châ-bó͘-lâng cháu-chhōe chiàⁿ-pán ê hêng-bô͘
查某人走揣正板的形模
註 縛女：受束縛 ê 查某人。
