Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: Lîm Bí-gio̍k
Téng-ji̍t-á ū chi̍t-mê, m̄-chai siáⁿ iân-kò͘ khì bāng-tio̍h Liû-kiû, Okinawa. Tī bô-khîm bô-khi̍p ê bāng–ni̍h, góa ká-ná tńg-khì kàu í-keng sio–khì ê Siú-lí-siâⁿ. Chū-án-ne, cheng-sîn liáu-āu, nn̄g tang chêng chhit-thô ê kì-tì tī thâu-khak-lāi ná cháu-bé-teng ti̍t-leh se̍h.
Hit-kái lú-hêng, ta̍k-kang ê-chái tùi Ná-hu-a（Naha）ê Hiok-kiô khí-kiâⁿ; kiâⁿ 4, 5 kong-lí lō͘ kàu bo̍k-te̍k-tē ( 6 kong-lí khah-ke–ê chiah ē tah kong-chhia), ná-chhan-chhiūⁿ gín-á-sî oán-chiok án-ne; hoaⁿ-hí koh khoài-lo̍k. Góa bô pān kok-chè bāng-lō͘; tī Tâi-oân seng kā lō͘-sòaⁿ ūi tī phō͘-á–ni̍h, tē-lí kiⁿ-hūi seng chhâ Kú-kok（Google） tē-tô͘ kì tī thâu-khak-té; kàu Liû-kiû to̍h ná kiâⁿ ná him-sióng in ê kiàn-tiok kah chhī-iông, thoân-thóng hām hiān-tāi. Thiⁿ chheng-chhái, lâng sóng-sîn, móa-ba̍k ê kéng-tì kù-chāi góa hiáng-siū. Góa ēng kha kah Liû-kiû sio-chioh-mn̄g.
Ná-hu-a ê phok-bu̍t-koán, bí-su̍t-koán, kó͘-chiàn-tiûⁿ, Hái-kun-hô Kong-hn̂g, Hông-lêng, Siú-lí-siâⁿ, sīm-chì Tiong-iong Iû-piān-kio̍k, chhī-chèng-hú, thoân-thóng-pò͘-tiàm, gîn-hâng, góa lóng kiâⁿ-kha-kàu; siōng-bóe kang chhun pòaⁿ-po͘, chiah tī chhī-lāi kiâⁿ-kha-hoe. Góa lo̍h-sio̍k tī chit-phiàn thó͘-tē, chú-tōng kah chāi-tē-lâng chih-chiap. Ū-tang-sî-á ē kah in khai-káng, kau-ōaⁿ ì-kiàn; mā kah chi̍t-tùi Hoat-kok lâm-lú-pêng-iú tàu-tīn chia̍h-pn̄g, kau-liû tang-se-hong bûn-hòa; che lóng-sī chiâⁿ khoài-lo̍k ê kì-tì. Ta̍k kang lóng se̍h kah thiⁿ-àm chiah kè-giàn, chiah kam-goān tńg-khì chheng-liân-lú-koán.
Ìn-siōng chin chhim–ê sī, in ê chhù-the̍h bûn-lí hó-khòaⁿ-thâu. Tōa keng súi-khùi, sè keng sok-kiat. Lóng ū ka-tī ê te̍k-sek, koh lóng bô sio-siāng. Bô-lūn sī kiâⁿ tī in ê tōa-thong-lō͘ á-sī sè-tiâu-hāng-á, ná kiâⁿ ná him-sióng in ê kiàn-tiok, chiâⁿ chhù-bī. Ū-ê chhù-the̍h siat-kè kah chin kî-khá, sú lâng tōa-hoaⁿ-hí! Chia-ê kiàn-tiok-su ná-ē chiah ū châi-chêng, chiah ū chhòng-ì leh? Lēng-ji̍t-á góa nā ū châi-tiāu ka-tī khí-chhù, chiok siūⁿ beh khí hit-hêng–ê!
Liû-kiû-lâng ê bīn-hêng-á kah Ji̍t-pún-lâng bô-kâng. In khah o͘-bah-té, ba̍k-chiu chin tōa-lúi. Hó-lé ê thêng-tō͘ mā ū chha. Ji̍t-pún-lâng kheh-kheh-khì-khì, ū-ê hó-lé kah hō͘ lí ē pháiⁿ-sè; Liû-kiû-lâng pēng bô án-ni-siⁿ. In kah lán kāng-khoán; lán tùi gōa-kok-lâng mā chiâⁿ hó-lé, chóng–sī bô chhan-chhiūⁿ Ji̍t-pún-lâng hó-lé kah ē àⁿ-io; lán bô hit-khoán bûn-hòa. Liû-kiû-lâng mā bô! In hó-lé ê hong-sek kah lán sio-siāng, che hō͘ góa kám-kak chhin-chhiat koh chū-chāi.
Jī-chiàn kî-kan Liû-kiû ê pi-chhám thong-lâng-chai. Tiān-iáⁿ “Kǹg-thih Eng-hiông”（Hacksaw Ridge）ê kò͘-sū to̍h hoat-seng tī chia. Góa khì kàu Chiân-tiân soaⁿ-lūn（The Maeda Escarpment）, chē tī soaⁿ-lūn-á-téng ê chhiū-á-kha, sióng-siōng hit-tang-sî ê kau-chiàn sio-thâi. Jîn-lūi ê le̍k-sú to̍h-sī it-ti̍t leh siong-sat, sú lâng ai-siong koh kám-khài. Taⁿ, chân-jím chho͘-chhân ê chiàn-cheng í-keng chiâⁿ-chò le̍k-sú, ba̍k-chiu-chêng ê kéng-tì súi-bô-pí. Khiā tī chia ê iû-kheh, pau-koat góa, chiong-kî-bóe mā ē chiâⁿ-chò kòe-khì. Thô͘-kha ū chi̍t chiah ùi chhiū-á-téng lak–lo̍h-lâi ê kiat-le, i mā chiâⁿ-chò kòe-khì a. Góa ka khioh tńg-lâi chò kì-liām; i sī góa ê té-khǹg-á, té hit-ê soaⁿ-lūn-á ê kì-tì.
Ēng kha kiâⁿ-ta̍h Ná-hu-a ê thó͘-tē sī chin khoài-lo̍k sóng-sîn ê thé-hōe. Góa siūⁿ, che kah kiâⁿ Tiâu-sèng-lō͘（Camino）sī kāng-khoán hoaⁿ-hí–ê. Bat khòaⁿ-kòe chi̍t kù ōe án-ni siá, “Tng lán ēng oán-chiok lâi chhin-kūn thó͘-tē ê sî, chiàⁿ-chiàⁿ sī leh chim tē-kiû.” Ū-iáⁿ! Oán-chiok thang ti̍t-chiap chhin-kūn tē-lí kah jîn-bûn; lâng oán-chiok ê sî só͘ khòaⁿ–tio̍h-ê, ìn-siōng te̍k-pia̍t chhim, liân thiⁿ mā kám-kak te̍k-pia̍t chêng-hô! In-ūi ēng oán-chiok se̍h Liû-kiû, góa bē-su khì bong-tio̍h in ê le̍k-sú kah hong-thó͘ ê me̍h-kó͘.
Ū-lâng kóng Liû-kiû kah Tâi-oân ê ūn-miā chiâⁿ sio-kâng. Nā ùi bîn-cho̍k ê kak-tō͘ khòaⁿ, sī ū-iáⁿ; in-ūi pêⁿ-pêⁿ hông si̍t-bîn chin-kú, pêⁿ-pêⁿ giōng-beh sit-khì bûn-hòa kah bó-gí, pêⁿ-pêⁿ siū thóng-tī-chiá phì-siùⁿ. M̄ -koh, tng góa khòaⁿ-tio̍h in to͘-chhī lāi-té ê khe kèng-jiân ū hoat-tō͘ chheng-khì-tang-tang, in ê chhī-iông hiah-ni̍h-á chéng-chê, kiàn-tiok hiah-ni̍h súi-khùi, koh kèng-jiân thang pó-liû in ông-kok sî-kî ê ûi-chek kah khèng-tián (che kám bē gāi-tio̍h in tùi Ji̍t-pún ê jīn-tông? ); chia–ê, lóng hō͘ góa kám-kak in kah lán ê ūn-miā chin bô-sio-kâng!
Àn-cháiⁿ-iūⁿ bô-sio-kâng? Jī-chiàn ê sî, Liû-kiû hō͘ chiàn-cheng thún-ta̍h kah chiâⁿ chhi-chhám. Bí-kun ê chà-tôaⁿ kā in ê thó͘-tē khian kah mi-mi-mauh-mauh! Ná-hu-a ê chhù-the̍h kiàn-tiok sì-hun-saⁿ sio-liáu-liáu, kui-ê siâⁿ-chhī piàn hóe-sio-po͘, siong-bông koh-khah bián-kóng! M̄ -koh, chiàn-āu ê Liû-kiû, têng-thâu hoat-tián. Chhī-iông ōaⁿ-sin, Siú-lí-siâⁿ têng-khí; chiâⁿ-chò góa só͘ khòaⁿ–tio̍h ê chheng-sin chéng-chê ê só͘-chāi. Á lán leh? Chiàn-aū ê Tâi-oân, Ji̍t-pún-lâng khí-chō ê kiàn-tiok kah siat-si thiah kah chhun gōa-chē? In Liû-kiû ê kiàn-tiok hiah súi-khùi, á lán Tâi-oân ê kiàn-tiok, í Tiong-hoa Bîn-kok bí-ha̍k khí–ê ê kiàn-tiok kám ē khòaⁿ-kháu chit? Ji̍t-pún têng-khí Liû-kiû ông-kok sî-tāi ê Siú-lí-siâⁿ, koh pān khèng-tián; á lán Ji̍t-pún-sî-tāi ê le̍k-sú, soah hō͘ Tiong-hoa Bîn-kok ut-áu, koh beh kā lán sé-náu chò Tiong-kok-lâng! Chiàu án-ne khòaⁿ, hō͘ bûn-bêng-kok-ka si̍t-bîn kah hō͘ chha̍t-bé-chèng-koân si̍t-bîn, sī thiⁿ chha tē leh o͘h!
Kiat-bé lâi kóng, Bûn-bêng-kok-ka gī-lí-sī, chha̍t-bé-chèng-koân loān-sú-lâi!
