Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 李南衡
福伯看tio̍h我真歡喜，大聲喝講：「緊入來坐。我講一個趣味ê代誌hō͘你聽。」我坐好勢伊tio̍h講，咱台灣有一句俗語話：「法律千萬條，beh用家己chhiâu（Hoat-lu̍t chhian-bān tiâu, beh ēng ka-kī chhiâu.）」你敢bat聽過？我應講：「He是30幾年前ê代誌，台灣猶tī戒嚴時期ê白色恐怖統治，無奈ê人民上愛、上流行提這句台灣俗語話來 keng-thé（供體）當時ê司法官。我已經真久無聽人講ah，你那會忽然間想起這句俗語話？」
福伯講，台灣一直有一寡人愛kui-oang-kui-tóng冤家相拍，政府真頭疼、無in ê法。過去有歸陣人相拍相刣，若是無人提告傷害，警方干單會tàng依《違反社會秩序維護法》來裁罰，罰小可錢對惹事分子「bē疼mā bē chiūⁿ」。2020年1月，對《刑法》妨害秩序罪第149條、第150條進行修正，kā罰金修khah懸，kā「公然聚眾」修正作「Tī公共場所聚集三个人以上」，施強暴脅迫者、在場助勢ê人，處一年以下有期徒刑、拘役抑是10萬箍以下罰金；首謀kah下手實施者，處六個月以上、五年以下有期徒刑。老實講，若beh tī烏道拼聲勢，無人會驚關，因為往往是愈關愈大尾。
2021年5月19，中央流行疫情指揮中心指揮官陳時中宣布，全國提升疫情警戒到第三級，全國標準一致一體執行。進入第三級警戒，民眾外出ê時tio̍h全程掛嘴掩；停止室內5人以上，室外10人以上ê聚會；營業kah公共場域tio̍h落實掛嘴掩kah維持社交距離。福伯講，警察人員聽了知偌呢歡喜！我戇mà-mà問講，負責治安ê波麗士有啥thang歡喜？福伯the̍h 6月初一ê剪報hō͘我看：15个人完全無管防疫，相約 tī高雄市大寮區包公廟前chhiâu債務，昨暗傳講有人相拍，警方隨時組「快打部隊」到位，現場攏總15个人， tī三台車頂發現有8支棍仔kah goluhuh球桿，kā車頂有藏棍仔ê 8个人依《社會秩序維護法》移送，所有聚集ê 15个人，違反防疫規定，依《傳染病防治法》函送衛生局裁處。一个人罰30萬。有效無？罰30萬當然足有效！福伯笑講，chit步咱台灣無去申請世界專利，外國人mā會使運用。6月26新聞報導，英國媒體piak孔講英國衛生大臣罕可靠（Matt Hancock）對伊結婚15年ê夫人無忠實，tī辦公室kah一位已經有翁婿ê女部屬有攬有唚。6月25，衛生大臣公開向大眾會失禮，講伊tī防疫期間「無遵守社交距離」。法律千萬條，伊偏偏去chhiâu chit條，聽起來那像好厲害，實在是真低路，當然無效。第二工mā tio̍h乖乖正式辭職。
