Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 高英男
以色列人入迦南，離開上帝行黑暗。
飼牛飼羊koh種作，食好穿好做輕khó。
流奶 kap 蜜地肥媠，日子好過變匪類。
以法蓮山拉瑪城，信主家庭好名聲。
哈拿足媠若天使，以利加拿好翁婿。
盡心盡性koh盡意，二人疼主遵旨意。
敬拜真神迎真光，示羅獻祭無隔斷。
無kap魔鬼行共路，上帝是真一條路。
擔土疊磚汗喢滴，為tio̍h新厝真拚勢。
翁某同心齊合力，晟隔佈置盡心力。
耐心等候頭chiūⁿ囝，向望上帝賞賜囝。
萬事齊備欠東風，腹肚實在袂cheng-chông。
擘腹遺憾無後嗣，以利加拿用心思。
Koh娶毗尼拿做某，m̄是娶某是娶惱。
大某細姨真艱苦，失去平安kap喜樂。
心內怨嘆無tâ-ôa，以利加拿搥心肝。
一年一擺大獻祭，全家動員行同齊。
提心吊膽人真慒，路尾平安到示羅。
找無空縫無塊tháu，tǹg椅tǹg桌歹聲嗽，
毗尼拿剾洗phì相，供體哈拿無燒香，
眾人面前大漏氣，卸世卸眾真枉費。
喙齒筋咬gī-gī-chùn，苦楚委曲做伙吞，
哈拿餒志放聲吼，聖殿崎仔目屎流，
祈求天父賞賜囝，奉獻為主來賠命。
以利年老目睭花，掠準哈拿講酒話。
無影無跡無疑誤，上帝計畫無錯誤。
信是天國ê鎖匙，鎖匙打開piàⁿ福氣。
迫切祈禱成心願，賞賜古錐糖酸丸。
哈拿歡喜囝出世，向主求討「撒母耳」。
細囝健康有出脫，食奶sai-nai 真活潑。
愛聽媽媽講故事，無煩無惱無掛慮。
母囝連心知彼此，殷勤祈禱交託主。
沓沓滴滴算著數，恩典滿滿真奇妙。
時間親像水湍流，三年一目nih就到。
活命冕旒做香祭，聖殿服事主上帝。
哈拿手牽撒母耳，交互祭司老以利。
跟綴祭司學禮儀，聖化裝備bat真理。
以利後生行罪惡，作惡多端人厭惡。
日思夜夢心肝囝，數念改換變感謝。
哈拿深信守約束，以色列人得祝福。
暗靜默禱二十年，百姓回心koh轉意。
重新造就人心神，清氣無點無皺面。
米斯巴地主照顧，非利士人毋知路。
飛石走山真恐怖，雷公sih-nà閃無路。
救主施落大拯救，慈悲憐憫心承受。
「以便以謝」離苦難，上帝一直teh幫贊。
哈拿祈禱有力量，軟茈攏beh變勇壯。
正手攑高全宇宙，應允超過咱所求。
地ê柱屬耶和華，保守跤步無搖泏。
Í-sek-lia̍t lâng ji̍p Ka-lâm, lī-khui Siōng-tè kiâⁿ o͘-àm.
Chhī gû chhī iûⁿ koh chèng-chō, chia̍h-hó chhēng-hó chò khin-khó.
Lâu-leng kap bi̍t tē pûi-súi, ji̍t-chí hó-kòe piàn húi-lūi.
Í-hoat-liân soaⁿ La̍h-má siâⁿ, sìn Chú ka-têng hó-miâ-siaⁿ.
Hap-ná chiok súi ná thiⁿ-sài, Í-lī-ka-ná hó ang-sài.
Chīn-sim chīn-sèng koh chīn-ì, nn̄g-lâng thiàⁿ Chú chun chí-ì.
Kèng-pài chin Sîn ngiâ chin-kng, Sī-lô hiàn-chè bô keh-tn̄g.
Bô kap mô͘-kúi kiâⁿ-kāng-lō͘, Siōng-tè sī chin chi̍t-tiâu-lō͘.
Taⁿ-thô͘ thia̍p-chng kōaⁿ chha̍p-tih, ūi-tio̍h sin-chhù chin piàⁿ-sì.
Ang-bó͘ tâng-sim chê ha̍p-le̍k, chhiâⁿ-keh pò͘-tì chīn sim-le̍k.
Nāi-sim thèng-hāu thâu-chiūⁿ-kiáⁿ, ǹg-bāng Siōng-tè siúⁿ-sù kiáⁿ.
Bān-sū chiâu-pī khiàm tang-hong, pak-tó͘ si̍t-chāi bōe cheng-chông.
Peh-pak ûi-hām bô hō͘-sû, Í-lī-ka-ná iōng sim-su.
Koh chhōa Pí-nî-ná chò bó͘, m̄-sī chhōa-bó͘ sī chhōa-ló͘.
Tōa-bó͘ sè-î chin kan-khó͘, sit-khì pêng-an kap hí-lo̍k.
Sim-lāi òan-thàn bô tâ-ôa, Í-lī-ka-ná tûi-sim-koaⁿ.
Chi̍t-nî chi̍t-pái tōa-hiàn-chè, chôan-ke tōng-ôan kiâⁿ tâng-chê.
Thê-sim tiàu-táⁿ lâng chin cho, lō͘-bóe pêng-an kàu Sī-lô.
Chhōe bô khang-phāng bô-tè tháu, tǹg-í tǹg-toh pháiⁿ-siaⁿ-sàu,
Pí-nî-ná khau-sé phì-siùⁿ, keng-thé Hap-ná bô-sio-hiuⁿ.
Chèng-lâng bīn-chêng tōa-làu-khùi, sià-sì sià-chèng chin óng-hùi.
Chhùi-khí-kin kā gī-gī-chùn, khó͘-chhó͘ úi-khut chò-hóe thun.
Hap-ná lóe-chì pàng-siaⁿ háu, sèng-tiān kiā-á ba̍k-sái lâu.
Kî-kiû Thiⁿ-pē siúⁿ-sù kiáⁿ, hōng-hiàn ūi Chú lâi pôe-miā.
Í-lī nî-lāu ba̍k-chiu hoe, lia̍h-chún Hap-ná kóng chiú-ōe.
Bô-iáⁿ bô-jiah bô-gî-gō͘, Siōng-tè kè-e̍k bô-chhò-gō͘.
Sìn sī Thian-kok ê só-sî, só-sî phah-khui piàⁿ hok-khì.
Pek-chhiat kî-tó chiâⁿ sim-goān, siúⁿ-sù kó͘-chui thn̂g-sng-ôan.
Hap-ná hoaⁿ-hí kiáⁿ chhut-sì, ǹg Chú kiû-thó “Sat-bó͘-ní”.
Sè-kiáⁿ kiān-khong ū chhut-thoat, chia̍h-leng sai-nai chin hoa̍t-phoat.
Ài-thiaⁿ Ma-ma kóng kò͘-sū, bô-hôan bô-ló bô khòa-lū.
Bó-kiáⁿ liân-sim chai pí-chhú, un-khûn kî-tó kau-thok Chú.
Ta̍p-ta̍p tih-tih sǹg tio̍h siàu, un-tián móa-móa chin kî-biāu.
Sî-kan chhin-chhiūⁿ chúi chhoan-lâu, saⁿ-nî chi̍t-ba̍k-nih chiū kàu.
Oa̍h-miā bián-liû chò phang-chè, sèng-tiān ho̍k-sāi Chú Siōng-tè.
Hap-ná chhiú khan Sat-bó͘-ní, kau hō͘ chè-si lāu Í-lī.
Kun-tè chè-si o̍h lé-gî, sèng-hòa chong-pī bat chin-lí.
Í-lī hāu-seⁿ kiâⁿ chōe-ok, chò-ok-to-toan lâng iàm-òⁿ.
Ji̍t-su iā-bāng sim-koaⁿ-kiáⁿ, siàu-liām kóe-ōaⁿ piàn kám-siā.
Hap-ná chhim-sìn siú iok-sok, Í-sek-lia̍t lâng tit chiok-hok.
Àm-chīⁿ be̍k-tó jī-cha̍p-nî, peh-sìⁿ hôe-sim koh chóan-ì.
Têng-sin chō-chiū lâng sim-sîn, chheng-khì bô tiám bô jiâu-bīn.
Bí-su-pa-tē Chú chiàu-kò͘, Hui-lī-sū lâng m̄-chai-lō͘.
Poe-chioh cháu-soaⁿ chin khióng-pò͘, lûi-kong sih-nà siám-bô-lō͘.
Kiù-chú si-lo̍h tōa chín-kiù, chû-pi lîn-bín sim sêng-siū.
“Í-piān-í-siā” lī khó͘-lān, Siōng-tè it-ti̍t teh pang-chān.
Hap-ná kî-tó ū le̍k-liōng, nńg-chiáⁿ lóng beh piàn ióng-chòng.
Chiàⁿ-chhiú gia̍h-koâiⁿ chôan ú-tiū, èng-ún chhiau-kòe lán só͘ kiû.
Tē ê thiāu sio̍k Iâ-hô-hoa, pó-siú kha-pō͘ bô iô-choah.
