Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀


 

咱佇教會內聽真濟「道理」,叫做「信仰」ê 道理,聽真濟教義、悔改、禮典 ê 理論;主日學有講真濟真趣味 ê 故事、神蹟,學生一世人攏會記得。Chóng–sī,教會生活真少 chhōa 學生出去外口,叫學生去 hō͘ 風吹、雨淋、褪赤腳、潦溪水、聽鳥仔唱歌。教會訓練咱一世人做一个「室內」ê 基督徒,訓練咱做一个「頭殼」ê 基督徒。一直到咱死,欲埋入去土裡,牧師猶佇墓仔邊講道理。

看咱基督教 ê 上帝 kah 世間所有宗教㒰款,攏有二个面向:一爿是理論 kah 教條 ê 上帝;另外一爿是佇大自然中間,人 ē-tàng 體驗 tio̍h ê 上帝。後面 ê 彼个上帝 kah 世間人所講 ê 上帝/神明,有真濟共通 ê 所在,因為咱有共通 ê 人性,生活佇共通 ê 大自然攝理。

半世紀生活佇海外 ê 我,固定一定愛轉去故鄉看看咧,主要是欲看古早細漢大漢 ê 彼爿山、彼條溪水;koh-khah 重要 ê,是欲轉去看阿爸 kah 阿母埋 ê 墓地,彼个有花有草、向 tio̍h 海 ê 彼塊土地。去到遐,看 tio̍h 遐 ê 花草,吸 tio̍h 遐 ê 空氣,tō 會感受 tio̍h 故鄉 ê 呼吸,聽 tio̍h 爸爸 kah 阿母 ê 叫聲。

當初上帝創造世界,有講伊創造 ê 世界一切「真好」koh「真媠」(創世記1章31節),所以有交代咱 tio̍h 做一个藝術家去欣賞,做一个詩人去吟講,做一个會曉效勞這个世界 ê 管家。上帝創造 ê 這个世界就是咱 ê 聖殿,上帝 m̄-sī 干焦蹛佇教會內面,教會不過是人做 ê 聖殿;上帝 ê 聖殿就是咱生活四圍 ê 大自然,包括天星、溪水、樹木,kah 天頂 ê 飛鳥,野地 ê 百合花。

教會 ê 教條、教理、信仰告白、禮典等等,雖然是咱信仰 ê 一部分,m̄-koh,遐– ê 不過是咱 ê 信仰 ê 一半;咱 ê 信仰 ê 另外一半,包括咱摸 ē-tio̍h、看 ē-tio̍h、啉 ē-tio̍h、鼻 ē-tio̍h、食 ē-tio̍h ê 生活 ê 全部。Chiah-ê 教會外 ê 生活 ê 部分,毋是信仰 ê 「配菜」,顛倒是咱信仰 ê 「主菜」,是咱對上帝 ê 信仰真重要 ê 部分;chiah-ê 部分是上帝創造 ê 神聖 ê 部分。咱生活 ê 周圍細節,攏是上帝創造 ê 「神聖」,咱 m̄-nā to̍h 跪佇聖壇頭前,咱 mā-to̍h 跪佇上帝創造 ê 大自然 ê 頭前。

咱 ê 上帝命令咱 tio̍h 疼厝邊,揹起十字架,行艱難 ê 路途 ê 大使命;㒰款,咱面對大自然 mā 有上帝交代 ê 大使命,就是 tio̍h 疼這个大自然,為 tio̍h 這个大自然揹起咱人類 ê 十字架。路加福音時常寫講主耶穌避免人群,行入去自然曠野,意思 mā 是講,咱 ê 主耶穌 mā 需要佇自然中 tit-tio̍h 安慰 kah 充實 ê 力量。

教會內所講 ê sī 正義、醫治、自由、得救 ê 道理;仝款,咱佇外面 ê 大自然,mā ē-tàng chhōe-tio̍h 安慰、平安、鼓勵、充實 ê 力量。主耶穌 ê 教示內底,特別是對我這種草地出身 ê 囡仔來講,最大感觸是伊講大自然 ê 道理:「試看天中 ê 飛鳥,無種作,無收成,無積聚佇chhek-chhng(粟倉),恁 ê 天父也咧飼 in ……試想山裡 ê 百合花,怎樣大欉,in 無 tio̍h -bôa,無紡織,但是我共恁講,當所羅門王極 hâng-ngó͘(行伍)ê 時,伊所穿 ê ,毋值得這蕊花。」(馬太福音6章26~30節)。

過去以來,咱人類踳踏、破害、輕視大自然,表示咱毋知啥物是神聖、美麗、完美。咱若袂當佇飛鳥、百合花看 tio̍h 神聖 kah 美麗,就看袂 tio̍h 上帝 ê 神聖 kah 美麗。主耶穌叫咱去「看」、去「想」山裡 ê 百合 kah 天 ê 飛鳥,因為 in 是代表美麗 kah 真理。佇 in ê 所在,無罪惡、無悲傷、無流目屎。主耶穌講 ê 是一種攝理:咱袂使崇拜自然,但是咱袂使離開自然,因為自然是飼咱 ê 老母。

這爿溪水,彼爿山,是咱身魂徛起 ê 所在,所以咱 tio̍h 出去,出去大自然內面,去 chhōe 上帝 ê 攝理。人生 ê 遭遇三不等,坎坎坷坷,起起落落,變化真濟。但是世間只有一項無變,就是故鄉 ê 一山一水,永遠佇遐發出招呼 ê 聲音,親像老母咧叫囝,無時無陣咧叫,叫這个流浪天涯 ê 囝轉來。咱 ê 上帝就是佇遐咧苦叫咱 ê 老母,叫咱轉去伊 ê 身邊。上帝是一位慈悲憐憫 ê 上帝,親像大自然,包圍咱、保護咱,伊就是偉大 ê 母親,是全宇宙、全人類、萬世萬代 ê 上帝,是咱心靈平安 ê 源頭。

廣告/手到心至抄寫本-箴言

我有話要說