Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉方迎鳳
一二三四五 上山弄猛虎
挲挲虎仔頭 食穿無「煩惱*」
踢踢虎仔蹄 財寶入大庫
搖搖虎仔尾 替恁避劫數
摸摸虎仔耳 好運當咧助
拍拍虎尻脊 共恁添歲數
一二三四五 年頭虎祝賀
逐家虎過年 虎年萬世虎
Chi̍t nn̄g saⁿ sì gō͘, chiūⁿ soaⁿ lāng béng-hó͘
So-so hó͘-á thâu, chia̍h chhēng bô “hoân nâu”
That-that hó͘-á tê, châi-pó ji̍p tōa khò͘
Iô-iô hó͘-á bóe, thè lín phiah kiap-sò͘
Bong-bong hó͘-á hīⁿ, hó-ūn tng leh chō͘
Phah-phah hó͘ kha-chiah, kā lín thiam hòe-sò͘
Chi̍t nn̄g saⁿ sì gō͘, nî-thâu hó͘ chiok-hō
Ta̍k-ke hó͘ kòe-nî, hó͘-nî bān-sè hó͘
*煩惱：華語發音。
