｜Hôe-èng｜◎Chan Kèng-siông
Tāi-pō͘-hūn ê phok-bu̍t-koán só͘ tián–ê, sī jîn-lūi bûn-bêng ê hoat-tián, ah-bô to̍h sī chū-jiân seng-thài. Jîn-khoân Phok-bu̍t-koán bô kā lí lâi chit-thò, i siaⁿ-siaⁿ-kù-kù beh hō͘ ta-ke chai-iáⁿ, in-ūi Pe̍h-sek-khióng-pò͘, ū chē-chē bû-ko͘ kap tui-kiû chū-iû bîn-chú ê Tâi-oân-lâng siū kok-ka-ki-hāi bô-kong-pêⁿ ê lêng-tī, sím-phòaⁿ kap koan-ah. Góa lú khòaⁿ, sim-chiâⁿ lú tîm-tāng. Góa mā siūⁿ-beh mn̄g Siōng-tè, ūi cháiⁿ-iūⁿ ū chi̍t-khòaⁿ pháiⁿ-tāi teh khó͘-to̍k sè-kan-lâng?
Kóng-tio̍h phok-bu̍t-koán, góa teh siūⁿ, chit-ê sè-kài to̍h-sī Siōng-tè chhin-sin chhòng-chō ê phok-bu̍t-koán. Lāi-té ū chhiⁿ-chhùi ê soaⁿ-niá kap hoa̍t-phoat cháu-siù. M̄-koh in-ūi lâng ū chōe, phò-hoāi Siōng-tè chhòng-chō ê bí-siān, só͘-í phok-bu̍t-koán lāi-té ū kài chē pi-siong ê kò͘-sū. Chóng–sī, Siōng-tè mā si-hêng sìm-phòaⁿ kap chín-kiù, beh hō͘ lâng jīn-bat Siōng-tè ê thiàⁿ.
In-ūi hoaⁿ-hí kap pi-siong kâng-sî lóng tī sè-kan, lán chiah ē thang chai-iáⁿ Siōng-tè it-ti̍t lóng kah lán tī-teh. Lán nā tī Hái-seng-koán, ē-tàng o-ló Siōng-tè ê chhòng-chō; lán nā tī Jîn-khoân Phok-bu̍t-koán, ē-tàng thê-chhíⁿ ka-kī mài kah Kok-bîn-tóng hâm Pek-sa-sat kāng-khoán chiâⁿ-chòe khi-hū pa̍t-lâng sòa kan-hoān Siōng-tè ê si̍t-bîn-chiá.
