【台文世界】Siōng-tè ê Phok-bu̍t-koán

◎Tēⁿ Liông-kng

Ká-sú Siōng-tè nā beh khí chi̍t-keng phok-bu̍t-koán, I it-tēng ē kiò goán lâi chò koán-lí-jîn. Siōng-tè kó͘-chá kiò Ná-a chō tōa-chûn. Hó-ka-chài, Ná-a ū thiaⁿ-thàn Siōng-tè ê bēng-lēng, nā bô, sè-kài ê bûn-bêng chá tō í-keng lóng siau-bia̍t khì–ah. Téng-ji̍t-á, Pe̍h-ōe-jī Sèng-keng Tha̍k-chheh-hōe kóng tio̍h Siōng-tè ê phok-bu̍t koán, hōe-āu, góa lâi-kàu Redondo hái-piⁿ, sai-chiò-ji̍t tú-beh lo̍h-hái, hái chīn-pōng ê hit-pêng, boán-hâ âng-kì-kì, kám ē Thài-pêng-iûⁿ se-lâm hái-piⁿ éng-oán ê kò͘-hiong teh chò hong-thai ?

3 tang chêng tī chit hái-piⁿ hū-kīn ê Lâm-oan Tâi-oân Ki-tok Tiúⁿ-ló Kàu-hōe, góa kap ùi Canada, Tâi-oân, Ji̍t-pún lâi ê tông-chì pān tē 23 kài Sè-kài Tâi-gí Bûn-hòa-iâⁿ. Kòe bô gōa kú in-ūi Tiong-kok Hì-iām hong siâⁿ, Redondo hái-piⁿ chiâⁿ-chò góa hông-hun-sî sàm-pō͘ tîm-su ê só͘-chai, tī hia thé-giām Siōng-tè chhòng-chō ê ò-pì. Ji̍t lo̍h ū ji̍t chhut. Ji̍t chhut ū ji̍t lo̍h.

Put-ti put-kak, ji̍t-thâu tîm lo̍h hái. Ǹg tò-chhiú-pêng khòaⁿ kòe-khì, Palos Verdes pòaⁿ-tó soaⁿ-lūn-á téng ê teng-hóe í-keng chi̍t-pha chi̍t-pha kng–khí–lâi. Góa tòa tī soaⁿ-lūn hit-pêng khòaⁿ ē tio̍h Thài-pêng-iûⁿ ê só͘-chāi. Kiàn-pái khòaⁿ tio̍h boán-hâ, to̍h ē siūⁿ tio̍h sè-hàn sî tī Tâi-lâm pēⁿ-īⁿ chháu-po͘ thiaⁿ tio̍h A-bú hông-hun hn̄g-hn̄g ê kiò-siaⁿ: “A-kng ah, ji̍t-thâu beh lo̍h-soaⁿ ah, kóaⁿ-kín tńg-lâi chia̍h-pn̄g ò͘”.

Chi̍t sî boán-hâ í-keng àm–khì, àm-bong-bong ê hái-bīn ū phû iáⁿ, m̄-chai sī khé-bêng-chheⁿ, á-sī teng-hóe ê hoán-siā? Bông-bū chiām-chiām tah óa, sîn-pì koh chhin-chhiat ê kám-siū, giân-gú oh tit hêng-iông, siūⁿ beh hip-siòng tiah lo̍h–lâi. Bô phah-sǹg, chhiú-ki soah hiáng khí–lâi, bīn-chheh ê Tâi-gí pêng-iú hôe-èng kóng in mā ū thiaⁿ tio̍h A-bú ê kiò-siaⁿ, bô bē kì-tit 3 tang chêng tī chia ê iok-sok, chi̍t ê hái-piⁿ ê kong-kéng in ē-kì-tit. Goán chiàu tong-sî ê iok-sok, kè-sio̍k tī bāng-lō͘ chū-hōe, iōng Pe̍h-ōe-jī tha̍k Sèng-keng, lūn Tâi-oân bûn-hòa.

Siōng-tè nā ū kiò goán chò I phok-bu̍t-koán ê koán-lí-jîn, goán “Pe̍h-ōe-jī Sèng-keng Tha̍k-chheh-hōe” kap “Sè-kài Tâi-oân Bûn-hòa Lūn-tôaⁿ” eng-kai tō sī Siōng-tè khí-chō ê Tâi-bûn Phok-bu̍t-koán, kì-lio̍k chi̍t tīn m̄-kam-goān Tâi-gí hông siau-bia̍t ê lâng kap Siōng-tè tâng kang ê kò͘-sū.

廣告/手到心至抄寫本-箴言

我有話要說