Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tihtih-hû
Chhùn-kháu m̄-sī hó͘-kháu, Tiong-i ēng chhiú kā-lâng cha̍t-khì-me̍h, hit ê só͘-chāi kiò-chò chhùn-kháu. Cha̍t-me̍h m̄-sī chhim-ji̍p-sèng ê, sī Tiong-i-su bāng, mn̄g, bûn, chhè, che sì ê chín-toàn hong-se̍k ê chit-chióng.
Kin-á-ji̍t beh siāu-kài ê pí-kàu-tek khah chiap-kīn mn̄g-chín ê hong-se̍k. Iōng mn̄g-chín ē hong-se̍k, Tiong-i, Se-i, Hàn-i, Lân-i (荷蘭醫)lóng sio-siāng. Chí-sī beh mn̄g ê m̄-sī ka-sio̍k mā m̄-sī pēⁿ-lâng, sī beh mn̄g i pak-tó͘-lāi hit-bóe bīn-thâng. Tī Hàn-io̍h-tiàm lia̍h io̍h-á ē thâu-ke in-ūi i m̄-sī Tiong-i-su, i bē kâng cha̍t-me̍h, tān-sī i chin lī-hāi, i tī toh-téng khǹg chi̍t pún chheh, choan-kho sī lia̍h bīn-thâng.
Hong-hoat tō-sī kiò pak-tó͘ ū bīn-thâng ê lâng tha̍k chhut hit pún chheh ê hàn-io̍h miâ: “O͘-thâu, tong-kui, chheⁿ-phôe, se̍k-tē”, chi̍t-kú chi̍t-kú tāu-tāu-á liām chhut-siaⁿ, liām kàu hit chiá thâng m̄ chhut siaⁿ ìn. Thâng nā m̄ chhut siaⁿ ìn hit bī ê io̍h-á miâ, lia̍h io̍h-á ē thâu-ke tō ē kā hit hāng io̍h-á hō͘ hit ê pak-tó͘ ū bīn-thâng ê lâng the̍h tńg khì choaⁿ lâi lim.
