【那teh褪色ê台灣俗語話】手曲,屈入無屈出

Chhiú-khiau,khut-ji̍p bô khut-chhut.

◎李南衡

福伯問我:「你敢bat聽過:『手曲,屈入無屈出(Chhiú-khiau,khut-ji̍p bô khut-chhut)』chit句台灣俗語話?」我應講:「聽是bat聽過,總是無真瞭解伊ê意思。」福伯講:「Chit句台灣俗語話ê意思是講,人ê手koh曲一定彎倒入來,無人會彎倒出去ê。那像,有啥代誌應該是替家己ê人想,講家己ê人ê話,幫助家己ê人 chiah tio̍h。」我應講:「世間人攏mā按呢。若照天生自然,手koh曲是beh按怎彎倒出去咧?」福伯受氣講:「台灣最近tio̍h是出一寡孽子手曲屈倒出去!」

福伯講:「中國共產黨足可惡,一日到暗來亂,干單舊年10月初一至初四,中共軍機一直飛入咱防空識別區(ADIZ)西南部,10月初一38隻次、初二39隻次、初三16隻次、初四56隻次,鬥起來149隻次。國際社會實在看bē落去,真濟國攏有表達重大ê關切。美國白宮批評中國『破壞穩定』,應停止進行『惹空ê軍事活動』,而且重申對台灣ê承諾是『堅固那磐石。』美國國務院講重話批評:『中共行徑破壞穩定,有可能致使誤算ê風險,mā會削弱區域和平kah穩定。阮敦促中國停止佇軍事、外交kah經濟上對台灣施壓kah脅迫。』澳洲政府警告中國絕對bē使採取威嚇抑是動武等手段,強調維持印度太平洋地區ê安全。日本防衛大臣岸信夫講,日本防衛省密切關注中國kah台灣中間一直擴大ê軍事失衡。德國外交部呼籲相關方面絕對m̄-thang採取致使破壞區域穩定ê舉動,若欲改變,現狀干單會使用和平ê方式,而且雙方同意chiah thang進行。蔡英文總統講:『中共戰機飛入咱防空識別區西南部來亂,已經嚴重破壞區域ê和平穩定。』伊正告北京當局,一定tio̍h愛有所克制,避免無注意彈tio̍h銃。」

福伯氣phut-phut講:「偏偏台灣內面出一寡手曲屈倒出去ê人。中共戰機來亂,顛倒怪咱政府。中國國民黨立委林德福佇立法院質詢財政部長蘇建榮ê時,問講:『是按怎政府一直主張升高對立,phāiⁿ負債mā beh買武器咧?蔡英文上台以來,足濟言語tio̍h是反中抗中。你m̄好去作美國人ê棋子。』財政部長應講:『咱無買武器,中共mā是一直裝飛彈對咱台灣。』退役上將、中國國民黨黃復興黨部主委季麟連講:『中共軍機按呢飛無算擾台』,koh講『東沙島上空屬佇國際空域,啥人都會使去。』國安局長陳明通直言:『中共對台侵擾一直無停過,東沙島是咱國ê領土,那會使講無領空?』Siáng都聽bē落去。」

福伯搖頭講:「Chit款ê孳子若愈來愈濟,in講ê話若會通,『手曲,屈入無屈出』chit句台灣俗語話,將來佇台灣tio̍h無人會koh講。」

廣告/聖經充滿我-經文填充本

我有話要說