【台文世界】韌命 ê 女性

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎陳柏壽

進前美國ê社會混亂親像西北雨ká到東倒西歪,就是黑人kap白人ê對立kah衝突:一个黑人頷頸去hō͘白人警察ê跤a̍p佇土跤約9分鐘,一直到斷氣。這ê情景hō͘一个叫做Darnella Frazier ê女性用手機仔hi̍p起來,將錄影交hō͘電視記者,代誌chiah爆發。這項代誌可能khah 袂佇台灣發生,因為台灣人hō͘人訓練講毋通管閒仔事,一人一家代,加一項代誌不如減代誌。但是這位美國婦人人,咱毋知伊是毋是食飽無代誌愛chhap閒仔事,伊就對頭到尾kā hi̍p起來閣公開,引起全美國ê暴動。這位女性做這項代是啥因端,mā無人知。咱會當知ê只有一項:就是「道理不平,氣死閒人」。美國自有歷史以來,黑人去hō͘人虐待欺負,mā是按呢,一冬過一冬,一代過一代,無人過問,無人發聲,黑人白人lóng仝款:欲慶祝ê時大家lóng來街仔路挵鼓跳舞,代誌發生ê時人人lóng kiu去後壁。Darnella chit-má猶是一位孤單ê女性。

埃及法老王欲châu-bia̍t以色列族群ê時,伊下令châu-bia̍t所有猶太ê查埔人。伊驚查埔人活咧,毋驚查某人。但是chhoàn-chhoàn起來作亂kah反抗ê就是查某人。摩西ê代誌,希伯來二位產婆Si-hut-la kah Phó͘-a hō͘人拖來法老面前審問,法老問in是按怎放生這個紅嬰仔無hō͘伊死,in二人雖然無讀啥物冊,但是真有智慧,應講:「希伯來婦人人真勇,生囝ê時,產婆到以前,囡仔就出來lah!」

聖經原文彼字「勇」是講in親像動物精牲咧生囝按呢,真粗勇,一聲就出來lah!這字是欲hō͘法老王歡喜,因為這字是咧講希伯來人應該就是精牲(出埃及記1章19節)。In用欺騙ê話術對付敵人,為著保全大我kah民族ê生存,人必須進入這款閣 khah koân ê倫理,我想這是上帝教示也允准咱台灣人ê生存之道。咱著用這款態度來做人,因為上帝是保護咱ê國家台灣ê上帝。

法老命令袂使hō͘查埔囝活,猶太人只好用草仔做ê箱仔,kā查埔紅嬰仔khǹg入內面,放入去尼羅河,隨波漂流去。

上帝ê攝理是法老王ê查某囝佇河邊洗浴ê時看著有紅嬰仔浮佇河中央,起憐憫,叫人將紅嬰仔對水中khioh起來,拄好kah咱台灣話產婆生囝叫做「khio̍h(拾)囡仔!因為紅嬰仔對母胎落出來有人用手去sîn,所以叫khioh囡仔」仝款。

另外有一個女性就是摩西ê老母Jochebed,伊生摩西後,知影是查埔囝,就違反王令,藏紅嬰仔3個月,後來藏袂牢(bē-tiâu),姑不將kah產婆合作,將紅嬰仔放入尼羅河,這是切心命ê最後ê決戰,一切交代hō͘上帝。茫茫尼羅河頂,生死未卜。這位外表看真軟弱,內面真堅強ê老母,佇伊ê靈性內面若準有看著上帝ê手親自teh chhōa路,所以伊就決心將囡仔放入水中。親像古早台灣人欲進入台灣海峽黑水溝ê心情,十去六死三留一回頭。

上帝ê攝理就是佇女性受看輕kah壓迫ê時陣,經過in ê反抗kah不合作,產生一種新ê智慧來保持in kah族群ê生存。婦人人ê韌命,會當鑽入去權力ê中心,來改變局勢。世間權勢文化,看若準無法度抵抗,但是上帝ê逆理就是經過看是弱者ê女性ê抵抗,經過in ê欺騙、創造,扭曲ê能力,破壞權力結構,產生社會改變。就是因為有信心ê女性,培養出chhōa以色列60萬百姓ê領袖,chhōa in徒步出西奈曠野入迦南地。外口有幾萬法老ê軍馬,追到紅海,顛倒lóng去hō͘海水淹死。遮ê歷史ê開始,lóng出自佇後面咧扶持、保護、照顧嬰孩ê chia-ê無出名ê女性。

女性,尤其是無出名ê,藏佇社會下層ê,無人知ê女性,實在是藏佇土跤ê反抗力量,in是真正咧創造歷史,支持咱民族生存ê力量。

我有話要說