Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lîm Bí-gio̍k
Sèng-keng ū chē-chē kan-sia̍p chiong-lâi ê biâu-siá: ū koan-hē sin-oan ê, ū koan-hē sím-phòaⁿ ê, ū koan-hē sin thian sin tē ê; m̄ koh sî-kî lóng bô siá, kan-taⁿ kóng “teh-beh án-chóaⁿ ” á-sī “teh-beh kàu–a”.
Sui-jiân sī án-ne, kan-sia̍p hit ê sî-ji̍t óa-kīn ê sî ē ū siáⁿ khoán tiāu-thâu, Kū-iok ê sian-ti, Sin-iok ê Pó-lô, sīm-chì Chú Iâ-so͘ pún-sin lóng bat kóng–kòe. Chāi góa khòaⁿ, “teh-beh kàu–a” sī chi̍t ê si̍t-chāi ê thê-chhéⁿ.
Lâng kan-taⁿ chit sì-lâng, siáⁿ-mi̍h sî-chūn beh “kiâⁿ–khì” lóng m̄ chai. Ū lâng kám-kak ka-tī teh-beh kòe-sin a, ū lâng sī hiông-hiông pia̍t-sè; án-ni-siⁿ, “teh-beh kàu–a” kám m̄ sī chin hó ê thê-chhíⁿ? hō͘ lâng sûi-sî kéng-séng? In-ūi tng lán kòe-óng ê sî, to̍h sī beh bīn-tùi Siōng-tè ê kî.
Siōng-tè ê sìn-si̍t tī Sèng-keng ni̍h ū kì-chài, tī seng-oa̍h tiong ū hián-bêng. Chāi góa ê thé-hōe, sìn-si̍t ê Siōng-tè bē ēng sian-ti ê chhùi chhìn-chhài hoat giân. “Teh-beh kàu–a” chit khoán kóng-hoat sī í lán iú-hān ê jîn-seng lâi kóng–ê; hô-hòng chheng nî bān nî chāi Siōng-tè gán-tiong lóng sī chi̍t ba̍k-nih, tùi tī I lóng sī “teh-beh kàu–a” ê tāi-chì.
Siōng-tè sìn-si̍t ê pún-chit ū éng-hióng góa ê kàu-io̍k thài-tō͘. Tī chhiâⁿ-ióng gín-á ê kòe-têng tiong, góa hán-tit kā in kóng “teh-beh kàu–a”, tû-khì sī 3 hun cheng lāi ē kàu á-sī ē oân-sêng ê. Chhan-chhiūⁿ sian-ti kū-thé hêng-iông Chú beh lâi ê sî ē án-chóaⁿ, góa mā kū-thé kóng-chhut koh gōa kú gōa hn̄g chiah ē kàu ē oân-sêng. Tùi gín-á lâi kóng, in chai-iáⁿ a-bú kóng ōe si̍t-chāi, chiū bē koh mn̄g; in ài chò–ê kan-taⁿ sī tán-thāi niā-niā.
“Teh-beh kàu–a” sī chi̍t ê thê-chhéⁿ, mā sī chi̍t ê kó͘-lē. Tò-péng lâi kóng, nā bô beh kéng-séng ê lâng, chún-kóng ka chí-chhut bêng-khak ê sî-ji̍t, in kám to̍h beh sìn?
