Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Chan Kèng-siông
Tī góa ko-tiong khó tāi-ha̍k ê kòe-thêng, Siōng-tè sī góa siōng tōa ê óa-khò. Tng tha̍k-chheh tha̍k kah ià-siān, ap-lek lú lâi lú tōa ê sî, sī thoân-khè ê hú-tō kap pêng-iú kā góa chi-chhî, sī Siōng-tè ê ōe-gí hō͘ góa an-ùi. Sui-jiân hit tōaⁿ sî-kî kài pháiⁿ-kòe, m̄-koh soah hō͘ góa kám-siū Siōng-tè ê pôe-phōaⁿ, ke-thiⁿ góa tùi Siōng-tè ê sìn-sim.
Khó-chhì ê kiat-kó chhu̍t-lâi, ū 3 ê kho-hē goān-ì kā góa siu-liû, kám-siā Chú. Chóng–sī, hoaⁿ-hí ê kám-kak chi̍t ē tō siau-sit, in-ūi góa m̄ chai beh tha̍k toh chi̍t ê. Chi̍t-ê sī góa siūⁿ-beh tha̍k, tān-sī pē-bú hoán-tùi; chi̍t-ê sī pē-bú ài góa khì tha̍k, tān-sī góa bô kah-ì; koh ū chi̍t-ê sī góa bô hèng-chhù mā bô jia̍t-chêng. M̄-koán kéng siáⁿ, lóng bô-hoat-tō͘ hō͘ ta̍k-ke boán-ì.
Góa kā iu-chhiû kau tī Siōng-tè ê chhiú, ǹg-bāng ē-tàng tit-tio̍h tap-àn. M̄-kú, tāi-chì m̄ sī gōng-lâng siūⁿ ê hiah-nī kán-tan. Siōng-tè m̄-bat kap I tng-chhe-sî khé-sī sian-ti hit-khoán chheng-chhó kā góa kóng I ài góa chò siáⁿ-mi̍h soán-te̍k. Iā in-ūi án-ne, góa khai-sí hoâi-gî Siōng-tè kám chin-chiàⁿ ē thiaⁿ lâng ê kî-tó.
Hit ê sî-chūn kā góa chín-kiù chhut-lâi ê sìn-liām chiū-sī “Teh beh kàu lah”. Góa chai-iáⁿ bô-lūn góa tha̍k toh chi̍t-ê kho-hē, Siōng-tè hō͘ lán ê ǹg-bāng éng-oán bē bô–khì, I ē pó-siú lán, hō͘ lán ū kàu-gia̍h ê lêng-le̍k kap sìn-sim khì oân-sêng I hoaⁿ-hí ê tāi-chì, ti̍t-kàu Chú koh lâi ê sî. Góa chí-iàu kè-sio̍k kun-tè I, I choa̍t-tùi bē pàng-sak góa. Chit-má oa̍t-thâu khòaⁿ, tek-khak sī án-ne, góa mā ē kè-sio̍k phō chit-ê ǹg-bāng.
