Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎歹銅舊鍚
咱這幾冬來有較注心佇理財方面ê冊，窮實，這金錢ê知識愈早學習愈好，不而過，嘛無咧嫌oàⁿ。若欲紹介予逐家，咱ê才調有影有破拍。資產類ê認捌、股票指數投資、全球化投資、逐冬閣再牽扯勻去、長期複利效應，72法則、4%提撥……等等。這人會講siuⁿ上深矣！
咱定問朋友敢有做數ê慣勢，敢清楚厝內支出收入ê狀況，家己保險ê內容。濟濟人講袂出喙。這敢著愛有真深ê知識？無啦，基本數學爾爾。
另一方面，金錢ê概念咱敢定著有？是按怎看金錢這項物？這上本質ê問題咱顛倒去想過！
這攏毋是咱今仔日想欲講ê。
這本囡仔冊，chhōa囡仔去公報社欲聽人講古時，阿齊提予我ê。冊名無啥吸引咱，薄薄仔。咱真緊唸予囡仔聽，家己煞感覺這是寫予大人ê囡仔冊，咧開破「好額人」ê偏見！
好冊！
一般tek，咱看好額人有一寡偏見、怨妒ê心理。好額人是按怎好額ê，in ê心理可能是按怎，敢攏無較正面ê？咱一般平凡百姓有錢了後閣會做啥款代誌、啥款ê反應？
這問題咱攏捌佇過去讀理財投資ê冊看過、思考過。是講矣，攏無像這一本薄薄ê囡仔冊有遐大ê衝擊。當然啦，凡勢嘛是咱ê知識有長進。
推薦這本佇2013出ê冊，假始朋友對理財投資金錢方面有興趣，這200外箍冊錢真俗。
