自由精神ê攝理──介紹新冊《用人智學ê觀點解釋啟示錄》

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

Chok-chiá: 陳柏壽

「上帝只有 tī 遠遠招呼;上帝 m̄-bat 強制。(God beckons, never forces ! )」這是我 tī 紐約哥大讀冊 ê 時,恩師 Douglas Sloan永遠留 tī̄ 我心內 ê 一句話。

最近對紐約來 ê 現代鋼琴家坂本龍一(Sakamoto Ryuichi) ê 演奏 hō͘ 我受著真大感動,伊用音樂 ê 表現闡明人類 kap 自然 ê 共生、人類 kap人類 ê 共生 kap 互助,以及世間事物 ê 多樣性 kap 包容性。最近畢卡索(Pablo Picasso)tī̄ 西雅圖 ê 畫展,hō̄͘ 我最大 ê 感觸亦是伊每幅圖包涵 ê 多重意境,譬如講伊一幅圖叫《戴帽仔 ê 女人》,將女性 ê 面,區分真濟小區域,用無 kâng ê 色彩來表現,眼、鼻、嘴 lóng khǹg不同所在,有不同表情,hō͘ 人感覺著女性心理 ê 多面性、多樣性、複雜性 kap 包容性。可能就是因為世間有這種女性 ê 包容 kap 深度 ê 精神內涵,hō͘ 人類這種動物會當繼續 tī 地球繁榮生存落來。

這2種人我想會當代表無論 tī 東方或西方,人類有 ê 共通點,就是人間 ê 精神,人作中心 ê 精神。這種人間性,簡單講叫做「人本主義」或「人文主義」。東西文化 lóng 有 bô-kâng ê 人本主義 ê 表現方式。基督教 ê 人文主義 tī 歷史上,一直隱藏 tī 教會 ê 教條、組織、教理 ê 底層,一直無法度超越教會 ê 封鎖;但是二千年以來,伊親像藏tī 太平洋深海 ê 黑潮伏流,對南海赤道,經過台灣黑水溝、日本海,侵入北極以及世界各角落;對保羅時代ê斯多亞哲學、黑暗中世紀 ê 修道主義,一直到文藝復興、理性主義,一直到唯智神祕主義(gnosticism)、自由思想、民主制度,一直到現在思想 ê 超現代主義、種族、文化、價值觀ê平等,lóng 屬 kâng 一個傳統,lóng kap 教會體制無一定有關係,甚至是一種抵抗教會、反對教會ê伏流;但是伊 ê 勢力真強,親像伏流 tī 深海,蘊藏 tī 人類 ê 意識內面,教會無法度制止。人本意識甚至變作領導教會 kap 社會 ê 力量。莫怪主耶穌 bat 警告人,教會若無出聲,路邊 ê 石頭 mā 會出聲,就是這個道理。

人就是人,人 m̄ 是上帝,所以人若欲研究聖經,kan-taⁿ 會當用人 ê 立場出發,m̄ 是用上帝 ê 立場出發,尤其是研究真濟謎點ê啟示錄,更加 tio̍h 用科學 ê、人性 ê、理性 ê 角度去探討。這種研究聖經 ê 方法 kap 態度,叫做「人智學」 ê 態度,就是用人有限 ê 智慧 kap 認識,去追 chhōe 上帝 ê 意思。

「人智學」特別是西方文明中真強ê傳統,不但 tī 神學,也 tī 政治、經濟、社會、學術、教育各方面有決定性影響 ê 力量。這個力量 kap 東方社會 ê 封建、固守、復古 ê 傳統 kap 宗教,更加是一種無法度妥協ê對立。「人智學」就是人類自由精神ê代表。人智學學者深信主耶穌所講:真理會 hō͘ 人得著自由,自由是真理 ê 一部分。

Tī 西方,集人智學大成 ê 學者首推德國神學家、教育家 Rudolf Steiner (1861~1925)。我 tī 奧國維也納台灣教會作牧師ê時,時時會去公園內伊ê墓地邊 á 默思,也去郊外伊出世 ê 舊厝參觀,主因是伊 ê 神學思想 kap 思考方法,真深進入我 ê 靈魂內面,變作我 ê 思考 kap 思想 ê 一部分。伊所創設 ê「人智學協會」(Anthroposophic Society)不但 tī 美國、日本受智識分子非常歡迎,各種演講會以及書藉出版,非常活躍。我ê指導教授Douglas Sloan亦是非常活躍ê學者。最近 tī 咱台灣 mā 有不止濟學者開始 teh 研究,書寫論文。

這本講是啟示錄註解,但是 kap 一般聖經註解ê冊不同,無做逐字註釋。伊是用人智學ê觀點,指出未來世界 ê 方向,hō͘ 讀者家己去思考伊對未來世界 ê 展望,建立伊家己信仰ê指南。「啟示錄」存在tī̄聖經ê最尖端,伊指導出一個「向前看」ê 基督教,陳述一個不斷活 tī 人 ê 世界、kap 人作伙奮鬥拍拚、向前行 ê 上帝,就是完全 ê 上帝,以及完全 ê 「人 ê 子(囝)」 ê 「人子」 ê 上帝。

上帝對人類有信心,所以「道成肉體」親自來世間作人;上帝對人有信心,所以伊創造一個約伯,hō͘ 伊經過肉體 ê 創傷 kap 心靈 ê 火煉,會 hō͘ 伊 ê 靈魂提升到至高 ê 所在;上帝對人有信心,所以容允魔鬼 tī 世間縱橫,目的是欲 hō͘ 天使長米迦勒,tī 最後 ê 戰鬥,制服魔鬼;上帝對人有信心,所以命令世間人著 tī 善惡對立 ê 鬥爭中,知影辯證 ê 道理,hō͘ 人會擴大視野,深耕信仰,認識一個更偉大 ê,更通信靠 ê 上帝。

上帝對人類有信心,所以伊指出咱一個真美麗 ê 未來世界,就是在 tī 這本「新 ê 創世記」 ê 啟示錄內面。二千年前咱 ê 主耶穌以及聖保羅所面對 ê「福音」kap「律法」ê 鬥爭 kap 辯證,一直到今仔日,一直到未來 ê 世界,繼續 teh 進行。未來世界豈真正是一個嚴刑峻法,充滿「審判」ê 世界?M̄是。這本屬靈 ê 冊hō͘ 咱知影,雖然現今所存 ê 是信、望、愛,以及「愛 ê 上帝」,未來 ê 世界更加是真、善、美,kap「自由」ê 世界。未來 ê 世界是「永遠 ê 福音」(14章6節)ê 世界,就是飛翔 tī 各國、各族、各方、各民ê  頂面,無受文字、文化、習慣、神學、教條等等因素 ê 限制 ê 福音。未來世界 tī 「外院」ê 人,可能比「內院」ê 人 khah 濟。

真濟名詞 tī 這本冊內,有真清楚 ê 解釋。未來 ê 世界 m̄ 是 「危機」ê 世界,是「轉機」ê 世界;上帝 m̄ 是「憤怒」ê 上帝,是有無盡難言 ê 溫暖 kap 熱心 ê 上帝;未來世界 m̄ 是欲「毀滅」,是欲「改變」、「兌化」、「質變」ê 世界。世界 ê「更新」,產生新 ê 天、新 ê 地,絕對 m̄ 是「重複」舊世界 ê 力量。「更新」就是所有人 ê 生活 kap 性命 ê 力量,「更新」就是所有「做人」 ê 條件 kap 目的──過去更新,今仔日更新,將來 mā 更新;家己更新,全世界一切 lóng 著、lóng 會更新。這就是人智學 ê 終末論,完美 ê 終末論。

我有話要說