 ◎李南衡
2008年，咱有一寡慶祝台灣縱貫線鐵路通車100週年紀念活動；事實上，台灣有鐵路是ùi清朝時代開始ê。1887年，台灣巡撫劉銘傳建築了ùi基隆經過台北大稻埕到新竹，總長有78.1公里、全線有16站ê台灣第一條鐵路，到1893年才全線通車。台北到桃園chit段kah現此時台灣鐵路局ê路線有小可無仝，t?大稻埕ê台北車頭經過大橋頭、海山口（今新莊）、打類坑（今搭寮坑，m?叫作龍壽）、龜崙口（今龜山），到桃仔園（今桃園）。
聽阮老父講，火車路經過阮門口，阮厝就是火車頭，連續幾間布店、金仔店lóng是阮阿公開ê。日本殖民統治台灣第6年ê 1901年重新建設台灣鐵路ê時，上大ê改變是因為嫌台北到桃園chit段山路坡度傷（siu?）崎，改ùi日後ê台北車頭經過艋舺、枋橋、鶯歌石到桃園。
1950年代中期，我ùi龜山去台北通學是坐公路局ba-suh，有坐火車通學ê朋友講in無赴tio?h車班，火車已經起行ah，in lóng m?是走走走緊跳起去車頂。可見hit陣火車tâ?-á起行ê速度並無真緊。按呢講起來，比hit陣早60外年清朝時代ê火車起行ê速度一定慢koh khah濟。
19世紀末ê人看tio?h火車加減會驚，何況m?-bat代誌ê狗！狗看tio?h烏烏一大台會霧煙、會khín-khóng叫、會行會走ê怪物，哪有可能無那jiok那吠咧！同時，火車m?-n?無可能插伊，顛倒愈行愈緊做伊去。相信「狗吠火車」（káu-p?i-hoé-chhia）chit種現象t?永過台灣逐所在lóng bat發生，應該誠普遍才tio?h。以後，若是有人對一項代誌有竟見，愈講愈大聲，可惜當事者抑是代誌ê主管m?-n?無插伊，事實上連聽都無teh k?聽，看tio?h chit種情形ê人有可能會hài?頭講：看伊講kah頷頸仔筋phòng-sai-sai，可惜那像「狗吠火車」。意思是講，伊按怎大細聲都無路用、無khah-choa?h。
「狗吠火車」chit句俗語話khah常用t?弱者對強者ê哭hai?，像講2009年，因為教育部軍訓處要求全國教官配合範例偽造文書填寫超時工作擴編，監察院對軍訓處提出糾正案。有人認為各國法律對文官ê規定，對軍訓教官哪有效咧？笑講監察院提出糾正案是「狗吠火車」！今年（2011）7月29新聞報導，監察院審計部總決算審核報告到底會tàng發揮偌大ê功能？高雄大學政治法律系副教授廖義銘認為，監察院審計制度是「狗吠火車」。Khah古錐ê是審計部副審計長王永興第2工反駁講：「審計部絕對m?是狗吠火車！」
看tio?h chit-ê報導，一位teh讀大學ê青年問我：「狗吠火車」是啥意思？是按怎狗beh吠火車？問一下煞h??我煩惱起來，連20外歲ê青年都m?知「狗吠火車」啥意思，按呢chit句台灣俗語話猶有偌久ê生命咧？
