Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎林朝成
《聖詩》（2009）第624首〈耶穌猶導路〉，作詞者是Nicolau Ludwig von Zinzendorf，伊ê名字無好記，起初我用「金針豆腐」來記，就記牢。Zinzendorf親像使徒保羅是一位虔誠ê基督徒，mā是熱心傳福音ê使徒，m̄-nā安呢，伊koh是傑出多產ê詩人，一生寫二千外首聖詩。
上帝賜hō͘ Zinzendorf ê恩賜非常豐富，但是伊論到自己，卻是簡單ê一句話：「我只有一個所愛ê，獨獨耶穌。」辛生道夫主後1700年5月佇德國ê德雷斯頓（Dresden）出世，1760年蒙主恩召。伊ê父母是敬虔ê基督徒。伊ê老父臨終ê時，抱出世才6禮拜ê伊，將伊奉獻hō͘主，向望伊一生跟隨主、服事主。Zinzendorf佇敬虔ê家庭長大，成為左右伊一生道路ê影響力量。
Zinzendorf細漢ê時，拄著一位屬靈ê主日學老師，這位老師不時對伊講：「無論是生是死，咱是屬耶穌ê，耶穌亦是屬佇咱ê。」這位老師ê話刻佇伊ê心內。伊決心一生為主來活，一生奉獻hō͘主。1710～1716年，Zinzendorf佇哈來（Halle）中學就讀，他佇中學組一个團契，這ê團契ê目標有二个：1.同心合一祈禱。2.傳福音chhōa人歸主。In製作一个小勳章，頂面寫「看哪，這个人！」（約翰福音19章5節）對小勳章ê故事，傳講耶穌基督ê福音，chhōa真濟人來信耶穌，遮ê初信者，攏加入當地ê教會。
畢業後，Zinzendorf本底向望ē-tàng讀神學院，成做傳道人。Chóng-sī，上帝佇伊身上有khah美好ê旨意，伊進入威丁堡大學法律系。佇大學二年ê時，伊參加莫拉維亞教會ê聚會，伊發現莫拉維亞教會信徒熱心傳福音，深深kā伊影響，伊mā開始熱心佇傳福音ê事工。有一日，伊佇斯特堡美術館，看見一幅耶穌受難圖，有話寫講：「我為你放捒一切，你為我放捒啥物？」伊ê心hō͘聖神感動，這幅圖是伊一生服事主ê轉機，伊求主hō͘伊kap主有khah親密ê關係，求主為伊一生ê事奉開路。
1717年，伊對威丁堡大學法律系畢業，到法國巴黎讀法律研究所，1721年對巴黎歸國，接受薩克森尼（Saxony）王侯聘做法律顧問。咱聽伊講：「我雖然佇世上有崇高ê地位，m̄-koh遮ê一點仔mā摸𣍐著我ê心。每一个主日，我佇教會服事、講道，我全心為傳福音來活。我深知我佇世間不過是旅客，我欲ǹg榮耀ê目標直直跑走。」因為這款感動，伊寫〈耶穌猶導路〉這首詩。佇這首詩，咱看𣍐著一位hō͘上帝賜福ê人對上帝ê謳咾kap感恩。翻轉，伊teh描寫基督徒人生ê道路充滿chhì-phè kap惡勢力ê攻擊，是一條崎嶇pháiⁿ行ê道路。因為當時是天主教kap基督新教嚴重衝突ê時期，真濟基督新教ê教會kap信徒受tio̍h天主教ê迫害。Zinzendorf雖然是王侯ê法律顧問，m̄-koh伊完全無看重世上ê榮華富貴、名聲地位，伊只有對重傳福音、chhōa人歸主ê工作，這是伊一生ê目標。伊知影這是一件艱難ê事工，必須全心仰望主、依靠主，才thang克服一切ê艱難困苦，完成主耶穌所交託hō͘每一位信徒ê大使命。Zinzendorf值得每一位基督徒來學習。
《耶穌猶導路》
- 耶穌猶導路，到天堂門戶，
道路雖然淒凊難行，
阮欲堅心好膽進前；
願主伸手牽，到祖家平安。 - 天路雖淒冷，對敵雖兇猛，
m̄准僥疑、驚惶纏阮，
m̄准信心、向望離阮；
對敵雖真多，到祖家穩會。 - 阮若有煩惱，祈禱就消無，
雖然又閣抵著試煉，
求主助阮吞愞無倦；
天開互阮看，憂悶就消散。 - 耶穌猶導路，到天堂門戶，
天頂救主猶原指示，
常常安慰、扶持、保庇；
互阮穩當到，踮佇天父兜。
