Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳姿吟
晉福m̄-niā認真看病，閣熱心佇社會關懷。1906年嘉義梅山大地動了後，晉福同業阿發仔相招去嘉義支援看病，hia ê人熱情接待，請晉福in食soaⁿ-hô肉。嘉義ê朋友講這款山頂kap chhân裡ê鳥鼠，phēng普通鳥鼠ke足大隻，bih佇甘蔗園、han-chû（番薯）園、番麥園kap竹仔林內底，khè甘蔗、食番麥，食 ê 物件足清氣，所以soaⁿ-hô ê肉，食起來足清甜，káⁿ-ná兔仔肉仝款。有 ê人看是大隻鳥鼠就毋敢食，其實這種山產kap一般 ê鳥鼠無仝款。Chhò甘蔗 ê 時，人就去圍soaⁿ-hô，若是soaⁿ-hô bih佇khang裡，就用薰ê來掠。
去到佇嘉義ê時，晉福發現日本政府已經派人去救災，跤手chiok mé，地動破壞 ê所在，大部分攏已經整理好勢。佇嘉義 ê時，嘛聽人講有一位男子，原本兩蕊目睭攏青瞑，去台灣府 ê病院動一kái簡單 ê手術了後，chit-má已經會當看見。伊四界傳揚上帝ê奇妙，m̄-koh晉福猶原認為傳統ê信仰bē當放。伊佇嘉義嘛遇著同業兼leh畫符仔、替人向神明問世ê漢醫，晉福嘛m̄相信，因為晉福看過用漢藥醫好bē少ê人，認為無用藥仔病會好是湊拄坎。「畫符仔kám有可能有效？」晉福kap阿發仔討論佇嘉義看著ê情形，不而過hia ê人káⁿ-ná足相信。
晉福ê阿公是「騎馬仔ê」，佇滿清做官，對泉州派過來台灣管理民眾，留佇安平經營漢藥鋪，晉福ê外媽是大目降社ê平埔族；月桃ê外媽有荷蘭人ê血統，所以晉福kap月桃ê查某囝阿妹仔，伊ê相貌綜合足濟無仝族群ê特色，目睭重巡閣大蕊，kha-chhng翹翹。
阿妹仔自細漢就對thâng-thōa（蟲豸）鳥隻kap si̍t-bu̍t（植物）感覺趣味，伊救路邊ê蟲，共囥轉去樹仔，閣共菜蟲用插佇水瓶ê菜葉仔飼起來，到蟲變作尾蝶仔。燕仔來in兜做siū（岫），會放屎，月桃想欲趕燕仔，阿妹仔共in阿母講m̄通趕，閣家己去洗鳥仔屎。阿妹仔愛栽花草，嘛對青瞑ê二兄清貴用心照顧。出外ê時，阿妹仔對乞食也足關心，伊感覺乞食足可憐，tiāⁿ-tiāⁿ hō͘ in 食ê物件。月桃不止煩惱，講這个囡仔過頭善良，外口hiah-nī險惡，將來毋知影阿妹仔欲按怎生活。
做老母ê月桃疼阿妹仔，有一工，月桃𤆬阿妹仔出去，經過路邊有人leh賣釋迦，就買一粒ho͘阿妹仔食，因為sàn-chhiah，干焦買一粒，所以老母月桃家己無食。阿妹仔食kah真歡喜，月桃問阿妹仔：「kám好食？」「好食！」阿妹仔回答。足濟冬了後，阿妹仔家己做老母，共查某囝講起這段回憶：「我足戇ê，是阮老母家己愛食釋迦毋甘食，干焦買一粒ho͘我食，我soah bē曉peh一塊ho͘阮老母，」阿妹仔共查某囝講ê時，伊ê老母月桃已經過身足濟冬：「所以，佇恁ê月桃外媽去台北kap清河阿舅tòa，ū-tang-sî-á轉來府城，阮攏辦足chheⁿ-chhau ho͘伊食，閣買足濟果子ho͘伊。」
阿妹仔食釋迦彼个時陣，月桃佇hia看查某囝自頭到尾食一粒，就káⁿ-ná家己嘛享受著釋迦ê甜蜜。阿妹仔無擘一塊釋迦ho͘老母，ē-sái講強欲一世人後悔：「我哪會遮戇？Hit-chūn少歲，猶bē曉。」人講及時有孝父母：「在生一粒豆，khah贏死後拜豬頭。」閣有俗語講：「雙手抱孩兒，才知父母時。」
「阮老父嘛足疼我，」阿妹仔共查某囝講：「細漢ê時，我共老父討錢，阮老父會問我講：『你討錢欲創啥物？』我講：『欲買chhùi-chia̍h物仔！』討一錢，阮阿爸攏會ho͘我兩錢。」
阿妹仔雖然名叫做「甜蜜」，m̄是號做「招弟」，不而過伊後壁有影𤆬一个小弟來。阿妹仔四歲ê時，就是1914年，阿弟仔清河出世。晉福kap月桃得著這个查甫嬰足歡喜，尤其是月桃，心內才得著安慰kap平安，因為彼陣ê想法是有後生將來食老才有倚靠，雖然第二ê是查甫清貴，m̄-koh早產閣青瞑，反倒轉ài煩惱伊將來ê生活。所以清河出世，hō͘老母月桃心內足大ê安穩，嘛因為家庭經濟已經改善，晉福心滿意足，講欲趁錢起大間厝ho͘某囝tòa。 （待續）
延伸閱讀：【甘為霖小說獎】
