Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯看tio̍h我to̍h搖頭講：「五角銀魚脯仔全全頭。（Gō͘-kak-gîn hî-pó͘-á choân-choân thâu.）」我笑笑問講，chit-má啥物時代，五角銀beh叼位買魚脯仔？福伯講：「我知。我是講永過錢khah大ê時代所講ê五角銀意思是小可錢，hit當時五角銀mā才會tàng買一屑仔魚脯仔，一下看攏總是頭。我問：「你講『五角銀魚脯仔全全頭』beh創啥？」福伯應：「我是teh講中國國民黨。」我笑一聲：「中國國民黨kah五角銀魚脯仔有啥關係？」
福伯講：「咱台灣chit句俗語話是講，一个團體無幾个人，逐个都想講家己是頭。Che抵抵是現此時中國國民黨ê生態。」我問講：「Chit陣in ê頭敢m̄是黨主席朱立倫？」
福伯講：「中國國民黨朱立倫主席所領導ê『四大公投』真悽慘，『土土土』koh加一字『土』，續落去1月初9中二區補選，選舉前一工朱主席猶koh講顏寬恒會贏，無疑誤五區攏總輸；中國國民黨大力支持顏寬恒罷免陳柏惟立委有成了後，朱立倫主席得意kah bē記得家己姓啥，竟然對立法委員林昶佐發出狂言：『抗中保台一定罷免』，結果1月初9罷免林昶佐mā無過。情勢隨時大變。孫文學校總校長張亞中講：『朱立倫應該跪落來向逐個會失禮。』張亞中那像黨主席teh命令一個部屬咧！馬英九前總統出聲講：『免跪。』有大尾boh？有關日本福島五縣市食品進口ê問題，中廣董事長趙少康講：『看新聞講中國國民黨認為日本若保證食品安全tio̍h無beh反對，伊講中國國民黨tio̍h表達清楚，bē使含糊。』趙少康叫朱立倫表態，認為中國國民黨應該堅定反對福島五縣食品進口，無別條路通行。那像老師teh指導學生tio̍h按怎做。中國國民黨前副主席、台北市前市長郝龍斌講：『2022年中國國民黨若beh選嬴台北市長，應該tio̍h藍白合，kah民眾黨佇選戰中合作，若無，可能攏輸。』那像黨主席。台北市長、民眾黨主席kā消遣：『應該藍綠合khah好。』」
我問：「朱立倫連輸三táu，in黨內喝『朱下韓上』hit-ê韓國瑜，敢m̄是一粒大頭？」福伯應：「當然！民意調查講中國國民黨已經失去少年人。韓國瑜隨時喝講：『2024年總統大選中國國民黨免選ah！完全是黨主席ê氣口。』」「照你按呢講，中國國民黨內底一堆人攏認為家己上蓋大、上蓋gâu，按呢朱立倫算是啥？」我問。福伯笑一大聲：「頂日政治評論家胡文輝供體朱立倫不過是『打工仔』，台語講作臨時小工。」
以後你若講「五角銀魚脯仔全全頭」，有可能無人聽有。甚至有人會問講五角是啥？Chit句台灣俗語話tio̍h會漸漸消失去。
