(請安裝Taigi Unicode字形，配合Firefox瀏覽器來讀)
作者：林俊育
踏話頭
19世紀初，宣教師 tī 中國南部傳基督教，in 感覺漢文是做學問考官用koh真pháiⁿ 學，無一般人民 ê 生活語言，對傳教真無方便，就以廈門話為主，使用羅馬字來書寫基督教宣教 ê 文字，hit當時 kā 伊稱做「白話字」（Pe̍h-ōe-jī），就是一般人通用 ê 文字。
羅馬字系統漸漸成熟，就有打馬字牧師（Rev. John Van Nest Talmage，屬美國歸正教會）編 ê《廈門音 ê 字典》，後來甘為霖牧師（Dr. William Campbell，屬英國長老教會）增補出版《廈門音新字典》。台灣教會公報社重新修訂2007年出版《甘為霖台語字典》。
台語信望愛珍藏白話字聖經有1852年 ê《約翰福音》kah 1881年 ê《列王紀上》，mā 有整理全羅版kah漢羅版上網（http://taigi.fhl.net/list.html ）。台灣教會公報社1885年創刊了後lóng用白話字，到1969年 hō͘國民黨政府禁止白話字chiah改用華語。
白話字 ê 字母只有“ch”（接 e, i） kah“t s”（接a, o, o͘, u, ng）有teh改變，其他字母kah調符位置lóng無變動。大略看起來，《巴克禮修訂版聖經》無使用“ts”，就是 kā“ts” 改做“ch”，以前 ê 版本聖經kah《甘字典》有使用“ts”。趣味 ê 是1852年白話字聖經（台語信望愛kan-taⁿ 收集tio̍h《約翰福音》）卻無“ts”，全部lóng是“ch”。
本文所講ê白話字原貌是指調符位置，就是 kā 受台灣教育部2009年公布「台灣羅馬拼音方案」影響 ê調符位置回復原貌。
台灣羅馬拼音方案
教育部整合出一套叫做「台灣羅馬拼音方案」tī 2009年公布使用，其實chit套羅馬字系統是 kā 台灣長老教會使用百gōa年久 ê 白話字約修改10%變成「台羅」，順續 kā 白話字正式改名叫做「教羅」。
「台羅」強調聲調 ê 調符tio̍h標 tī 響度khah-koân ê 母音頂koân，支持「台羅」ê 人koh要求「教羅」mā tio̍h跟tòe「台羅」來改白話字調符 ê 位置。就 án-ne，白話字 ê 支持者開始 ò͘ⁿ-ò͘ⁿ 嚷，ná 狗 á teh吠火車無chhái工。因為是長老教會家己放棄白話字 m̄ 用，hō͘人 án 怎改mā 是「初十二五無理髮」（無你法），哀聲吐氣無人beh chhap你。
詳細 kā 伊探討就知，「台羅」是「拼音方案」，khah注重拼音，tio̍h kā 調符標 tī 響度khah-koân ê 字母頂koân。白話字是「字」，khah注重好看，tio̍h kā 調符標 tī khah好看 ê 所在。
回復白話字原貌 ê 緣起
信望愛台語客語輸入法2.0版推出後，受tio̍h台語文界歡喜愛用，mā引起長老教會開始tńg來重視咱信仰祖先留hō͘咱 ê 寶貴資產──白話字，規定牧師資格tio̍h考白話字，koh要用信望愛台語客語輸入法phah講道稿，台灣神學院soah tio̍h回復白話字教學，感謝主！
Chit-pái趁更新信望愛台語客語輸入法3.0版 ê 機會，我向台語網呼籲「回復白話字原貌」，結果無人反對。耶穌講：「無反對咱，就是贊成咱。」（馬可福音9章40節）
講tio̍h beh回復大家soah起花，bē 記得白話字調符原來 ê 位置，tī 網路頂面討論kah bū-sà-sà。我只好提出一個原則，就是根據《甘字典》、《巴克禮聖經》、《紅皮聖經》kah現代台語譯本聖經，來chhōe出一致 ê 標準。
Taⁿ 白話字靠信望愛台語客語輸入法有一致 ê 調號位置，súi koh好看，大家lóng真歡喜。台語信望愛網站mā tòe-teh「回復白話字原貌」。從今以後，白話字是白話字，台羅是台羅，各自發揮，mài-koh有交chhap，mā 是真好 ê tāi-chì。
