(請安裝Taigi Unicode字形，配合Firefox瀏覽器來讀)
作者：Koeh Iàn-lîm
◎踏話頭
1947年 ê 228大屠殺，蔣家軍政府無辜殘殺台灣人，台灣人英勇反抗，但外來政權完全無人權觀念，公開審判、司法程序放一邊，台灣人無辜慘死。1948年12月初10，聯合國通過《世界人權宣言》；自1950年起，koh 正式 kā 12月初10訂做「世界人權日」，宣揚人權普世價值觀。
咱若對228台灣國殤日看1210世界人權日，會 tàng 體會人權自由 ê 可貴。不過，現代化 ê 民主獨裁者馬英九，統治技巧進步，無直接起刀弄槍，嘴 hoah 民主人權，雙手反倒轉操控司法體系，進行無流血殺人陽謀，陳水扁 ê 醫療人權在哪裡？65年前台灣人權烏天暗地，65年後台灣人權 kám 有出頭天？若無，問題出在哪哩？咱需要熱血台灣青年，需要65年前無受中國文化污染 ê 台灣魂精神──雄中自衛隊。
◎一齣描寫 228 ê 舞台劇
《天若光》，是一齣描寫228大屠殺 ê舞台劇，7月20至22 tī 高雄市文化中心至德堂演出4場。筆者是 tī《自由時報》地方新聞南部版看著《天若光》演出消息，chiah 趕緊買票來看。
《天若光》故事是描寫1947年，一陣愛sńg野球 ê 高雄中學學生，看著高雄社會治安亂七八糟，雖然高中生 m̄-bat 政治，但是 in 思考讀冊 ê 目的，tō 是 ài 做有路用 ê 人，所以當雄中校長宣布因為時局變亂，學校不得不停課，這陣高中生 soah 一睏仔 kiáⁿ sûi 轉大人，自發性 beh 保護學校。
《天若光》演出單位是台灣戲劇表演家，故事是用「倒敘法」，一開始是一陣老歲仔 tī 大樹腳開講，原來 in lóng是1947雄中野球隊隊員，228發生 t ī高雄時，in志願組成自衛隊保護雄中，這款 ê 精神感動雄女學生，雄女學生雖然無法度直接保護學校，但是in真體貼，志願包飯丸hō͘雄中自衛隊學生止iau，細粒細粒飯丸吞落去，雄中自衛隊學生 ná 食 ná 有氣力。
228事件過程中，有一寡落單、受傷 ê 阿山仔，雄中自衛隊學生以人權 ê 角度保護 in ê 性命安全，hō͘ chiah-ê 阿山仔對番薯囝有無 kāng 款 ê 看法。
雖然án-ni ，高雄市 ê 狀況愈來愈bái，自衛隊隊員決志去高雄車頭直接kap中國兵對戰，但是隊員寡不敵眾，有隊員因此過身，自衛隊只好撤退轉來雄中。
◎認識歷史 向望天光
劇情演到 chia，歷史 ê 部分算是交代完畢，編劇者開始 beh 催淚，《天若光》ê 歌詞投影 tī 舞台頂，góa soah無感動，內心 ê 感覺顛倒 kap 編劇者 ê 意圖當 teh 對抗。
為何 góa 心內會有 án-ni ê 感受leh？描寫韓國 228 ê 電影《華麗的假期》，其實 mā 有大學生自衛隊對抗韓國獨裁軍政府，當《華麗的假期》主題曲唱出來，góa ê 心情 hiông-hiông 激動，險險仔目屎 lìn出來 ah！和《華麗的假期》比較，《天若光》歌曲 ê 劇情部分，編劇者有意無意忽略中國兵 ê 過失，暗示觀眾 ài 和解。不過咱若看戰後德國反省 Nazi ê 暴力，咱會真清楚受害者若無主動表示 beh kap 加害者和解，國家體制若無清算屠殺歷史，追究元兇責任，lām sám 和解顛倒是再一次傷害被害者。所以我感覺《天若光》這條歌真 oh 發光！！
德國 Hitler tī 二次世界大戰屠殺600萬猶太人，猶太人 tī 戰後開始清算 Hitler 幫兇過錯，兇手除了認錯，koh ài 賠償 kap 處罰，避免 ko h出現第二个 Hitler。Che「清算」歷史並 m̄ 是負面，韓國 kap 德國一直清算歷史，歷史 chiah 會「天光」。
《天若光》tī 散場時，雄女學生主動送飯丸 hō͘ 觀眾食，觀眾食飯丸，腦海中浮現228事件畫面，這款加強觀眾記智 ê 方法，m̄ 若2010年 ê 白色恐怖音樂劇《金蕉歲月》有用過，今年台北228大遊行 mā 透過食魷魚môe 來追思李瑞漢，che kap 基督徒守聖餐食餅 lim 葡萄酒意義平仔真重大，hō͘ 食物 m̄ 若是食物，更加是透過食物來思考死 kap 活 ê 生命意義。
雄中自衛隊是228學生運動史真重要 ê 歷史記號，代表台灣學生保護家園，反抗外來政權，雖然出資包場 ê 高雄市市議員蕭永達無認同這款 ê 228史觀，總是 góa 猶原是 án-ni 看待，向望蕭永達議員諒解。期待台灣戲劇表演家 ē-thang 發行《天若光》DVD，hō͘ 無看過 ê 人，有機會了解這段228高中運動史。
