【台文世界】笑談鬼月普渡

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎陳俐雯

中元普渡tī台灣mā講做「拜七月半」,閣舊曆七月十五這工是地府中元地官 ê 壽誕,所擺濟濟台灣人tī七月半祭祖kap普渡孤魂野鬼、祈求地官赦罪,窮實mā有向神明祝壽 ê 用意。

囡仔時kan-na知影舊曆七月是鬼門大開 ê 鬼仔月,所有魔神仔全hông放出來。In kap我仝款mā有歇熱 ê 假期,che規個月ē-tàng自由自在tī陽間lōa-lōa-sô。便若舊曆七月初一chi̍t-kàu,鳥鼠仔膽 ê 我就足驚惶,因為三不五時就聽著電視放送一寡仔去溪邊á是去海邊仔耍水,煞hō͘水淹死ê新聞;若無就是足chhàu-tú-khám,定定tī仝一个所在發生災禍。阿媽講he是魔神仔欲投胎teh掠交替,in趁一冬一擺ê好時機,早就chiú tī遐 tng-tán,若掠著交替ê人選就會使去轉世,毋免閣做可憐ê散掖鬼。

鬼仔月閣有一項恐怖ê禁忌,就是袂使耍紙尪仔。Tī七月時仔定著愛提紅布kā khàm起來閣收hō͘好勢,按呢紙尪仔才袂hō͘歹物仔上身,變做鬼魂暗時仔走來揣我。會記得彼當時若欲睏攏kā阿姊khiú(搝)牢牢,mî-chioh-phōe(棉襀被)自頭到跤khàm kah密chiuh-chiuh,強欲袂喘氣,就是驚紙尪仔半暝會按空縫鑽入來,害阮常在驚kah暗時仔攏毋敢起來放尿,一直到大漢才知影he攏是teh騙囡仔 ê 。

鬼仔月雖bóng真驚人,毋閣中元普渡是台灣chiâⁿ重要 ê 民間信仰,tī舊曆七月半這工濟濟人為tio̍h欲表達對「好兄弟」 ê 誠意,會chhoân chheⁿ-chhau(腥臊) ê供物kap牲禮來拜「好兄弟」(魔神仔),場面是鬧熱滾滾。豐沛 ê 拜桌kā平時仔闊lòng-lòng ê廟埕chiⁿ kah tīⁿ(滇)that-that,閣較hông目睭金ê ,是一排一排五花十色用麵粉捏 ê 「看牲」kap「看桌」(普渡ê時排列出來beh hō͘鬼神看ê供物),捏麵尪仔 ê款型chē-mí-móa、濟kah算袂完,chiâⁿ siâⁿ–lâng(唌人),袂輸手路工藝大捙拚,大人、囡仔攏總圍tī桌墘金金相。

中元普渡阮上致意掖糖仔 ê 齣頭,定定猶袂開始,逐家就相爭提箱仔á是桶仔占好位,手一个比一个伸較懸,目睭隨个比貓仔目閣較金,就是欲等掖糖仔 ê 時會當搶較濟leh,真正是人比鬼搶較雄!完全kā鬼仔月ê恐怖放水流,chit-má想起來閣會起愛笑。

我有話要說